Despues cu e noticia a bira conoci fin di siman ultimo den cual Ducapro a informa tur esnan cu ta haci uso comercial di musica cu cuminsando 2024 lo mester paga un licencia pa haci esaki, minister di Comunicacion, Geoffrey Wever a reacciona sosteniendo e desaroyo.

Segun informacion cu Ducapro lo a manda diferente radio emisora, for di dia 1 di januari 2024, cualkier compania of persona cu haci uso comercial di musica ta bay tin cu paga pa e derecho pa haci esaki.

Esaki ta aplica pa cualkier instancia cu ta haci uso di musica di forma comercial, incluyendo radio, DJ, entre otro, segun organisacion pa licencia di musica den Caribe Hulandes, DUCAPRO a informa ayera. Esaki ta nifica cu for di dia 1 di januari proximo, ta bira ilegal pa reproduci musica di manera comercial sin tin un licencia di DUCAPRO.

Segun a informa, esaki ta conta pa tur musica, local y internacional, a traves di un acuerdo cu BUMA-STEMRA. BUMA y STEMRA ta dos organisacion priva na Hulanda, e Asociacion Buma y e Fundacion Stemra, cu ta opera como un solo compania cu ta actua como e sociedad Hulandes pa colecta pa compositor y publicador di musica.

Ta pidi e companianan pertinente pa registra boluntariamente pa adkiri un licencia comercial, unda cu lo mester paga un suma segun e tamaño y alcance di e compania. Si no cumpli cu e licencia, esaki por tin consecuencianan legal. E companianan cu ta cay aden ta cualkier cu ta usa musica di manera comercial, por ehemplo radio, DJ, pero tambe café, restaurant y gym.

Wever a reacciona bisando: “Mirando cu siman cu a pasa tabata tin hopi comunicacion y informacionnan mixto riba rednan social over di e fundacion DucaPro cu a anuncia cu entrante prome di januari 2024 lo mester cuminsa paga pa uzo di musica licencia, como Minister encarga cu tanto Bureau Intellectuele Eigendom, como comunicacion, mi kier a duna un prome reaccion.

“Ta asina cu musiconan por registra nan canticanan y asina nan canticanan no por wordo uza sin permiso of sin compensacion. E derecho aki na Aruba ta basa entre otro riba articulo 39 di Statuut y e Auteursverordening.

“Musiconan usualmente ta asocia nan mes na diferente organisacionnan rond di mundo cu ta representa nan y cu ta salvaguardia nan creencia y ta percura pa nan wordo paga ora cualkier organisacion uza nan derecho intelectual, manera un cantica. Tur e organisacionnan aki rond di mundo ta cera acuerdonan bilateral cu otro a base di cual nan ta cobra y distribui e compensacion pa uso di musica den un pais na e artista. DucaPro ta un organisacion asina na Aruba cu lo bay cobra pa e uzo di derecho di autor, basicamente den nomber di e artista y percura pa reparti e entradanan na e artista concerni, pues esaki por bira un entrada importante pa e musiconan local, pero na mes momento lo forma un peso financiero adicional pa e radio emisoranan.

“Mester remarca cu e relacion ta un relacion entre e artista cu ta miembro di un organisacion cu ta representa e artista, e organisacion y tur otro organisacion similar rond di mundo. Esaki no ta un iniciativa di gobierno, ni tampoco ta algo cu Gobierno di Aruba por stop of mitiga, e ta un relacion completamente priva (privaatrechtelijk) y usual rond di mundo.

“A pesar di esaki, mi ta spera si cu DucaPro drenta den dialogo cu tur radio emisora pa splica detayadamente con nan lo opera pa asina e introduccion por bay na un forma structura y cu menos impacto negativo pa e radio emisoranan. Ami di mi banda tambe lo bay drenta den dialogo cu tanto DucaPro como e radio emisoranan. Mi a puntra tambe conseho riba e tema aki mirando cu ta algo nobo pa Aruba cu lo tin su impacto. Nos mester cuminsa awo cu bon informacion y dialogo y sigur wak con por mitiga cualkier impacto negativo.”