Ayera mainta, minister di Enseñansa, Ciencia y Desaroyo Sostenibel Armando Rudy Lampe a ofrece un conferencia di prensa pa duna di conoce cu un grupo di hobennan lo studia pa bira maestro di scol via online na Hulanda y bibando na Aruba.

Minister Lampe a bisa ayera cu awor studiantenan por cuminsa haci nan bachelor na universidad di Merca bibando na Aruba, algo cu ta posibel desde algun tempo pasa.

Asina mes, el a anuncia cu awor studiantenan por haci nan bachelor na Aruba tambe, pero di Hulanda mes. El a expresa cu siman pasa e tabatin un encuentro entre Hogeschool na Hulanda y un cantidad di 80 candidato Arubiano pa sigui e estudio di bachelor in Education for di Aruba. Minister Lampe a afirma cu esaki ta un estudio di cuater aña.

Lampe a bisa cu nan ta bay cuminsa cu un grupo numeroso cu ta bay bira den futuro un maestro di scol. Ademas el a menciona cu e posibilidad aki ta interesante y cu nan a invita esunnan cu ta traha den enseñansa como klas assistent, cu nan no tin cu kita nan for di trabou; manera tabata sucede na IPA cu mester kita for di trabou pa por haci e educacion pa bira maestro y cu den caso aki ta un programa digital ta pa traha den enseñansa y pa mantene e persona den nan trabou; nan mes ta dicidi ki ora por haci nan lesnan y nan trabou ta bay bira nan stage.

E grupo aki lo wordo prepara pa nan por pasa e proceso y si despues nan ta logra pasa su examen na 2021, nan ta cuminsa nan programa di bachelor.

Na mesun momento Hogeschool di Hulanda segun minister Lampe ta habri pa tur persona cu ta interesa y no necesariamente ta limita pa e grupo aki, cu lo haya un preparacion pa e programa pero tambe pa otro studiantenan interesa. Igualmente studiantenan por ricibi nan Arubalening bibando na Aruba y door cu school aki tin acreditacion, unabes cu e lo haya e degree ey por traha na Hulanda of na otro pais di Reino Hulandes.

Segun minister Lampe esaki ta importante pa motibo cu e por premira cu den 5 aña lo ta bay tin un exodo atrobe di maestronan cu ta yega na edad di pension, den eynan e persona ta retira y ta laga espacio pa otronan mas hoben por cuminsa y construi nan bida mesun cos cu pensionado a haci.

“Den cinco aña nos ta bay tin mester di hopi mas maestro y ta p’esey nos ta cuminsa prepara”, minister Lampe a anuncia.

Di mesun manera, el a expresa cu esaki ta bay haya un gran interes di hobennan y esey ta mustra e cambionan cu tin pa studiantenan por haci nan bachelor bibando na Aruba manera a menciona caba y pa esaki tambe di Hogeschool na Hulanda por keda biba na Aruba hayando Arubalening.

Ademas, el a splica cu nan maneho ta dirigi pa crea diferente caminda di enseñansa pa hobennan pero tur cos ta depende di nan interes y nan talento, aworaki e mundo digital ta haci esey posibel cu ya caba tin algun di nan cu a scoge pa e trayecto na Hulandes y ta prepara e hoben pa traha den sistema di enseñansa Hulandes.

Di esaki, el a señala cu no ta e unico programa cu nan lo ofrece sino cu tambe ta existi e sistema Americano na Ingles y di otro banda el a anuncia cu nan lo inicia tambe e programa na Spaño cu lo cuminsa via Casa Grandi na unda por haci scol primario, secundario y e persona ta haya su diploma di bachillerato pa sigui studia na un universidad cu ta ofrece studionan na Spaño.

Tambe, el a informa cu door di implementacion di idioma papiamento na scolnan primario cu ta multilingual, tambe tin plannan pa implementa esey den scolnan secundario, pa loke ta educacion profesional manera EPB tambe tin cierto di nivelnan cu ta ofrece na papiamento.