Diahuebs ultimo, SKOA a celebra un encuentro cu tur directiva di scolnan Catolico di Obispado cu a bin for di Corsou, Sint Maarten, Boneiro, Sint Eustatius y Saba.
Minister di Enseñansa, Armando Rudy Lampe kende tabata un invitado special, a expresa cu e directiva di scolnan Catolico di Diocesis di Willemstad a reuni pa purba un bes pa aña pa topa otro, y ta SKOA ta esun cu a organisa e conferencia aki y cu ta maneha e mayoria di scolnan di Aruba.
Den su discurso durante e encuentro, Lampe a referi cu como Gobierno, nan a haci posibel pa duna apoyo tambe financiero na un curso cu ta tumando luga pa maestronan cu ta traha na scolnan catolico, y duna nan informacion religioso teologico, pa motibo cu nan ta mira cu den futuro e ta bira mas importante pa siña e muchanan balornan cristian, esunnan cu tin di haber cu e dies mandamento, balornan humano, etc.
Tocante esaki, Lampe a referi cu muchanan no ta bay scol pa siña lesa y skirbi so, sino cu nan ta bay scol muy specialmente pa wordo forma como hende y como cristian. Pa e motibo aki, nan a duna apoyo pa e reunion aki y esey tabata e mensahe cu directiva di scol Catolico di Aruba y directivanan di scol di Diocesis di Willemstad, den presencia di Monseñor Luis Secco, por conta cu nan apoyo.
Tambe el a informa cu e idea ta pa unabes cu e maestronan aki ta forma religioso y teologicamente, lo duna nan un rol mas prominente den loke ta e proceso di enseñansa di e muchanan, pa motibo cu e ta kere cu esey ta importante mirando e crisis di balornan cu ta existi. Tin hopi mas caso di abuso virtual di muchanan, cu tin biaha hende no ta enfoca riba esey sino riba abuso fisico, pero comunidad no ta wak ainda e cantidad di mucha cu ta birando victima riba internet.
“Esey ta e parti cu scolnan catolico mester siña, pa e muchanan tin sabiduria, sabiduria pa siña distingui entre bon y malo cu tin riba internet y empodera e muchanan pa nan no bira victima di abuso virtual”, cu ta keda un trauma hopi grandi pa un ser humano. Segun Lampe, e maestronan di scolnan catolico ta duna e empuhe y formacion pa yuda e muchanan riba nan caminda.
Tambe Lampe a señala cu Gobierno a apoya e traduccion di un bijbel pa mucha, cu ta ‘E Bijbel di Princhi’, cu ta traduci na papiamento di Aruba pa prome biaha y lo drenta na tur scol. Esaki pa motibo nan kier pa tur scol bay bek den educacion di buki di bijbel y maestronan bira mas activo pa loke ta e formacion.
Comments are closed.