Na 1996 Monumenten Bureau Aruba a keda institui oficialmente como un departamento di gobierno cu mester ehecuta nan maneho y control pa conserva y preserva nos edificionan monumental.

Nan tin 23 aña di existencia cu su prome y actual directora, Ing. Ivonne Web-Kock por a mira un desaroyo interesante como departamento tecnico di gobierno, riba tereno di monumentonan cu balor historico y cultural pa nos pais.

Maneho di gobierno.
Ta asina cu Monumenten Bureau Aruba, conhuntamente cu Monumenten Fonds y Monumenten Raad, tin e cuido di nos joyas monumental. Cada un di nan tin un funcion. Mientras cu Monumenten Fonds ta encarga fundamentalmente cu e parti financiero, y Monumenten Raad ta un hunta cu a wordo crea door di ministerio di Cultura pa duna conseho na e mandatario concerni. Den e caso actual na minister di Cultura, Xiomara Ruiz-Maduro. E tipo di conseho tin di haci ora cu gobierno mester duna permiso y tambe ora di proteccion.

Monumenten Bureau Aruba ta specificamente un departamento di gobierno encarga pa implementa e maneho di e minister. Pero tambe nan ta controla loke e ley mes ta prescribi. Ademas nan ta otorga permiso y controla e edificionan proteha. Cada dos siman autonan na servicio di e departamento aki ta pasa registra e 37 monumento protegi, pa wak cu no tin cosnan haci contra di ley.

Webb-Kock a relata na Bon Dia Aruba cu banda di e tareanan anterior, nan tin e tarea di restaura, unda nan ta prepara full e proyecto cu tin haci cu edificionan di gobierno, caminda nan arkitectonan ta pinta tur mapa y stipula e adkisicion pa un destaho publico. Igualmente e parti di supervision di e proyecto tambe ta bou nan encargo.

Centro di conocemento.
Nan tin un cantidad di tarea riba nan lomba, pero talbes no tur hende sa cu Monumenten Bureau Aruba ta e centro di conocemento di monumento na Aruba.

E ta un tarea masha importante cu nan tambe tin, y cu no tur hende ta consciente di dje. E departamento aki ta conta cu expertonan cu ta haci investigacion di nos monumentonan prome cu nan ta wordo restaura. Nan ta haci uzo di potretnan bieu cu nan por haya den archivonan.

Ing. Webb-Kock ta reconoce cu esaki ta un tarea cu ta demanda hopi di nan, ya cu tin biaha ta resulta dificil e acceso na cierto potretnan clave. E ta haci uzo di e oportunidad aki pa pidi e colaboracion di e hendenan cu por tin potretnan, unda edificionan monumental ta aparece ariba dje, pa comparti nan cu e departamento aki. Nan por yama libremente y personal di Monumenten Bureau lo pasa un rato pa saca un copia di dje.

“Nos lo keda hopi gradicido,” el a bisa. E sorto di material visual aki por yuda e expertonan di e departamento aki den nan investigacion historico rond di un edificio bieu, y specialmente di nos arkitectura di Aruba.

Pero na man cu e tarea di conocemento di monumento na Aruba, nan tin un tarea educativo. Regularmente nan ta bay tur scol, caminda nan ta dunado les riba e materia di monumento. Dos aña pasa, nan a cuminsa cu e proyecto aki, unda nan a bishita tur scol basico caba. Actualmente nan ta bezig cu scolnan secundario, caminda nan ta casi cla cu nan. Tambe nan ta bayendo na Universidad di Aruba cu e materia di monumento na un nivel mas halto.

Directora di Monumenten Bureau tambe ta comparti su conocemento y experiencia riba e tereno di monumento, dunando les na algun maestronan di Aruba y Corsou via online. E les aki, Ing. Webb-Kock ta dun’e den colaboracion cu Universidad di Corsou. Di un forma humilde e ta declara cu esaki ta un forma pa traspasa e conocemento cu su persona tin pa e siguiente generacionnan.

Den sintesis, Monumenten Bureau ta hopi amplio den su tareanan y compromiso cu nos comunidad y pais. Nan tin 11 tarea cu tin biaha ta bira hopi, considerando cu nan ta un departamento chikito. “Pero mi tin cu bisa cu mi ta hopi orguyoso, pasobra mi tin un team cu ta trahando hopi diligente hunto cu mi,” el a bisa.

 

 

 

 

 

LEAVE A REPLY

Please enter your comment!
Please enter your name here