Minister di Finanzas: Proyectonan PPP ta un peso grandi riba presupuesto di pais Aruba

Recientemente Minister di Finanzas a brinda un splicacion tocante di peso di e Proyectonan Public Private Partnership (PPP) riba e presupuesto di Pais Aruba.

Proyectonan PPP.
Actualmente Pais Aruba conoce 8 proyecto di PPP, cual ta e edificio di Belfin cu ta hospeda Departamento di Impuesto y Departamento di Finanzas, e edificio di Infra cu ta hospeda DOW, DIP y Kadaster, e Centro di Husticia na Macuarima, e edificio di Polis na Shaba, e edificionan di MFA na Noord, na Savaneta y na Sta. Cruz, e edificio di Hospital, Green Corridor y Watty Vos Boulevard. Di tur e proyectonan PPP, Hospital, Green Corridor y Watty Vos Boulevard ta e tres proyectonan cu mas ta costa y ta pisa riba presupuesto di Pais Aruba. Den aña 2020 nos lo mester paga 82 miyon na e proyectonan PPP, cual ta 20 miyon mas cu a ser paga den aña 2019. Di e 82 miyon florin aki di gasto di PPP, 70 miyon ta bay pa paga pa e proyectonan di Hospital, Green Corridor y Watty Vos Boulevard.

Watty Vos Boulevard tin mas riesgo financiero.
Recientemente Controlaria General di Aruba (ARA) a haci un investigacion riba e proyectonan PPP y a resalta e hecho cu e proyecto di Watty Vos Boulevard tin mas riesgo financiero compara cu otro proyecto PPP. Den e contrato a wordo concorda cu asina Pais Aruba perde credibilidad financiero, pues si e rating di Pais Aruba baha, Gobierno lo mester paga esunnan cu a desaroya e proyecto aki na un forma mas acelera. Esaki lo crea un peso financiero mas grandi ainda pa Pueblo di Aruba y ta debilita e situacion financiero di Aruba. Tipo di contratonan asina ta trece mas riesgo financiero pa nos Pais y p’esey ta di lamenta cu te awor e riesgonan aki ta bira conoci.

Maneho financiero prudente pa maneha gasto di PPP.
E gasto di e proyectonan PPP lo keda pisa riba Presupuesto di Pais Aruba te cu aña 2044. Mirando e riesgo financiero di algun PPP, ta importante pa Gabinete Wever-Croes y tur otro Gobierno di turno hiba un maneho financiero prudente pa evita perde credibilidad financiero y pone mas peso financiero riba presupuesto y Pueblo di Aruba.