Minister di Finanzas y Economia: CAFT satisfecho cu trabao; Gobierno ta urgi gremionan espacio pa sigui negocia cu Hulanda

No mester perde speransa. Aruba semper a logra sali di su retonan, pero comunidad por ta convenci cu Gobierno lo no permiti pueblo kibra su dilanti. Asina Minister di Finanzas y Economia, Xiomara Maduro a bisa awe, durante su presentacion di e relato di CAFT riba finanzas publico di Aruba.

E Minister tabata contento cu e evaluacion di CAFT riba e trabao duro cu tur e departamentonan cu ta resorta bou su cartera a haci, a pesar di e crisis di Covid, cu ademas di un crisis di virus y malesa, a bira un crisis di likidez. E reaidad sinembargo ta cu Aruba a registra un deficit di 266 miyon florin cu tabata locual a premira, y tabata e kwartaal cu segun proyeccion ta esun mas malo di 2020, mirando cu esaki tabata e periode cu e isla a sera su fronteranan. Awor cu turismo a cuminza bek, poco poco, y economia a cuminza draai, ta anticipa un deficit menos grandi. Pero esaki si tin e ayudo di Hulanda pa subsidio di salario y FASE, e Minister a bisa.

Preocupacion gremionan

Y ta netamente e di tres tranche aki ta den discusion enorme. E siman aki diferente gremio a bin dilanti pa urgi Gobierno acepta e condicionnan di Hulanda cu ta encera dos consensusrijkswet, cu ta pa formalisa CAFT cu ta dirigi pa un landsverordening, LAFT pa haci esaki un RAFT, y e di dos, cu ta e Entidad di Rescate y Reforma, cu ta bay ta encarga pa e siguiente ayudonan pero cu ta mara na condicionnan. Pa mayoria Parlamentario, e condicionnan di e entidad ta bay mucho leu ya cu den nan opinion e ta mina autonomia di Aruba. Pa Hulanda, e esey no ta e caso, sino cu unicamente asina lo kier sigura cu e placa Hulandes ta bon inverti y cu despues di siete aña, Aruba mes lo por sigui cu e maneho di un administracion publico y economia reforma.

Dos argumento valido

“Autonomia versus hamber. Esnan cu ta argumenta e dos aspectonan aki, tur dos tin rason. Sin autonomia Aruba no lo tabatin e progreso economico cu a conoce y cu ainda lo por bolbe, si mira con turismo ta cla pa bolbe. Sinembargo, autonomia tambe a keda atacha debi na e redoblamento di debe, cu a pone cu e pais a perde credibilidad,” tabata e comentario di Minister Maduro, kende a pidi comunidad consideracion na momentonan aki. E Minister a sigura cu na tur momento tin e bienestar di cada ciudadano den mente, y cu por tuma como siguransa cu Gobierno lo no lo permiti cu pueblo lo kibra su dilanti.

Relato CAFT

Segun e Minister, CAFT a bisa cu Aruba ta brinda mas informacion, mas splicaion y a duna mas bista di e trabao pa reduci gasto di personal, cu ta un di e pesonan mas grandi di finanzas publico

E deficit di 266 miyon tabata premira, y pa e di dos kwartaal ta spera di ta esun di mas malo pa e pais. Awor cu e frontera a habri y economia a cuminza lora. Di awor en adelante, e deficit lo bira mas chikito den e siguiente kwartaalnan. Pero esaki si e ayudonan pa subsidio di salario y FASE continua. “E crisis di Covid19 a bira e crisis di Likidez pa Aruba,” e Minister a subraya. Pero asina mes, a pesar di tur e presion, e ta orguyoso con a adapta mesora na un crisis financiero sin precedencia. Y netamente na momento cu Finanzata s Publico di Aruba tabata bayendo den bon direccion. No solamente tabata un surplus proyecta pa e presupuesto di 2020, a cera 2019 cu un surplus tambe, cu tabata e prome den 12 aña.

Reduccion di gasto

CAFT den su relato a constata cu e parti di entrada procedente di belasting directo a aumenta cu 27 porciento, pa motibo di loonbelasting. Esaki ta danki na e subsidio di salario cu a sigui paga. Tambe e maneho flexibilisa di dividendo unda a baha e nivel di belasting a logra cobra mas tambe cu normalmente ta drenta. Ta un incentiva fiscal cu a duna su efecto.

E contribucion di impuesto indirecto a subi danki na invoerrechten, cu a aumenta cu 19 porciento den e totalidad di entrada procedente di e tipo di belasting aki. Y entrada di BBO a conoce un aumento compara cu e prome lunanan, despues cu Aruba a habri su frontera.

Pa loke ta gasto di personal, esakinan a baha manera cu a premira. “Esaki conforme cu e trabao cu a haci pa corta den e gastonan di personal.”

Economia a cuminza draai

Locual ta premira pa e siguiente reportahe ta cu ta bay mira un deficit menos grandi, y esaki ta e caso si economia sigui lora. Turismo a cuminza riba un hopi bon ritmo, y lamentablemente, e contagio local di Covid a pone un freno riba e crecemento turistico cu a bin mas cu a spera inicialmente. Asina mes, Aruba ta hayando hopi propaganda gratis di e propio turistanan cu a bin Aruba y ta papia hopi positivo di e forma con nos hendenan ta responde. Tambe tin perspectiva pa e almacenamento di petroleo, pa cual tin seis compania serio cu a participa den e destaho. di Refineria di Aruba.

“Nos no mester perde speransa. Nos a saca e pais aki for di mil reto y ta nos mesun forza a haci esaki. Pa turistanan, Aruba ta un producto importante y nos mester kere den nos mes, uza tino y curazon, pero mester traha hunto pa logra.”

No perde cabez

Pero Minister Maduro no ta cera wowo pa realidad. E reto ta grandi y por yega na un momento cu mester di uza e unico alternativa cu a keda pa yuda Aruba den e crisis sin precedencia aki, esta yega na un acuerdo cu Hulanda.

E Minister a adverti si cu hasta si firma cu Hulanda, e no ta nifica cu situacion lo bolbe na e situacion prome cu Covid19. Al contrario. E condicionnan ta pisa y lo keda vigente pa hopi tempo. P’esey mes ta negociando ainda, y como tal ta pidi gremionan y comunidad e espacio necesario pa sigui delibera cu Hulanda. “ Nos ta compronde e preocupacion. Nos tambe ta preocupa, pero no mester perde cabez,” ta locual Xiomara Maduro, encarga cu Finanzas y Economia a bisa. Gobierno ta buscando e alternativanan pa caba di negocia na un forma decente, pasobra e condicionnan cu tin riba bisa no ta facil pa ningun hende.