Minister di Husticia Andin Bikker, tocante mocion di Parlamentario Van Dam: ‘No ta na Tweede Kamer pa dicidi si ta cambia statuut a base di mocion’

Ayera na mainta, Minister di Husticia Andin Bikker a ofrece un conferencia di prensa pa medionan local y el a splica e mocion cu a keda presenta den Tweede Kamer referente husticia den Reino, di parti di e Parlamentario Chris Van Dam.

Riba e topico aki, Bikker a informa cu a presenta un mocion di parti di Parlamentario Van Dam na Tweede Kamer, cual ta menciona incidentenan na Aruba, Corsou y Sint Maarten y den esaki e parlamentario a conclui cu a base di incidentenan en cuestion, lo mester bin cu un Rechtshandhaving, loke ta nifica cu husticia mester bin den man di Reino.

Mirando e mocion aki, Bikker a manifesta cu Hulanda ta bin cu conclusionnan como si fuera cu Hulanda ta esun cu ta dicidi pa Aruba. Huridicamente Aruba, Corsou y St. Maarten y Hulanda ta partnernan igual di reino, esey a pone cu Parlamento di Hulanda no ta Parlamento di Aruba y nan no por dicidi conforme statuut pa Parlamento y tambe pa Aruba.

Tambe Bikker a sigura cu esaki tabata un sorpresa, pa motibo cu e cifra di crimen, atraco cu arma y etc. na aña 2018 a baha. Di mesun manera el a menciona cu nan ta bezig cu Parlamento pa por introduci un screening di ministernan. “No ta na Tweede Kamer, ni Eerste Kamer di Hulanda pa bin dicidi si ta bay cambia statuut a base di mocion”, el a declara.

Ademas, Bikker a bisa cu un par di siman pasa a bin un reporte di Amsterdam cu ta informa cu nan no tin e criminalidad bou control. Dos diputado na Den Haag a haya mocion di desconfiansa pa motibo cu nan tin caso iregular andando y tabatin atakenan riba abogado. Esaki ta nifica cu tin incidentenan serio tumando luga na Hulanda y mirando esaki, husticia lo mester bay den man di Union Europeo, Bikker a declara haciendo un comparacion.

Bikker a declara cu Husticia ta un cartera hopi pisa, cu tin su retonan y den un rato ta haya indicacion di kico ta pasa na Hulanda pa tuma nota di dje. “Mi ta lamenta ora cu un parlamentario a base di incidentenan ta pone den un mocion diripiente, cu e ta pidi na Tweede Kamer cu e kier cambia statuut pa bin cu un Rechtshandhaving, y nos ta rechasa esaki”, Bikker a manifesta.

Aruba no tin indicacion pa esaki, segun Bikker mes a expresa. Tambe a splica cu e aña aki nan tin criminalidad bou control, e ora e mocion cu awe mainta lo tuma luga na Tweede Kamer pa Aruba –manera Minister Bikker mes a bisa– no tin efecto algun. Esaki pa motibo cu ‘nos no ta mara na dje, y cu tur respet, nos ta lamenta cu nan a bin cu e mocion aki, cu no ta constructivo’ , el a finalisa.