Weekend ultimo, minister di Transporte, Integridad, Naturalesa, y Asuntonan di Adultonan Mayor, Sr. Ursell Arends a haci un bishita na Saliña Druif, “pa wak e progreso cu ta tumando luga desde cu Bureau TINO a reuni cu FPNA, DOW y Tierra del Sol pa asina facilita e proceso pa instala e valve pa conduci awa di RWZI Bubali pa e saliña”, segun a informa riba pagina di Facebook di gobierno.
“Hunto cu henter mi bureau nos a habri e siman asina’kinan bishitando Tierra del Sol pa nos por a bay na Saliña Druif, caminda cu nos a bay mira cu desde cu FPNA (Fundacion Parke Nacional Aruba) a instala e valve pa conduci awa di RWZI Bubali pa e area aki, y tambe cu e awasero naturalmente, con e biodiversidad a cuminsa introduci su mes back, con e parhanan a cuminsa yega”, Arends a expresa.
El a agrega: “Mi ta sumamente contento di mira con ya caba cosnan chikito ta haci un diferencia. Esaki ta net dunando back e balor na nos naturalesa, y aumentando e biodiversidad, cu e cosnan chikito aki tin nan impacto.” El a bisa cu tin como tres siman cu ta mandando e awa na e saliña, y hunto cu e awasero, a crea un cambio na e area. E area no ta habri pa publico, pero gerencia di Tierra del Sol a habri pa e minister por bishita y observa con naturalesa ta prosperando den e area.
