Awe e politico Democrata Joe Biden ta huramenta como presidente di Merca, y ya caba ta wordo informa cu e lo firma varios decreto pa contene e contagio di e virus den nan pais. Minister di Turismo y Salubridad Publico, Dangui Oduber a indica cu cualkier medida tin consecuencia serio pa nos turismo.

Ya caba CDC a bin cu un exigencia pa tur biahero cu kier drenta den teritorio Mericano mester presenta un CPR test, locual tin su impacto caba riba e fluho di turistanan cu ta bin for di nos principal mercado turistico.

Minister Oduber ta spera cu unabes cu presidente Biden ta tuma posesion di su funcion no lo bin cu mas exigencia of medidanan mas pisa manera un lockdown, manera a yega di pasa na Hulanda y Inglatera. “Si esey pasa naturalmente nos ta bay tin mas problema cu nos tin caba…” el a declara.

ATA a yega di señala caba cu e volumen di alrededor di 45 mil turista cu nos a ricibi luna pasa lo ta menos e luna aki. E tipo di exigencia aki ta bira un peso extra pa e turista ya cu prome cu e ta yega Aruba, e tin cu paga pa un CPR test. Mescos prome cu e ta bay bek pa Merca, e tin cu paga pa otro test. Pero tambe tres dia despues cu yega Merca, nan tin cu haci otro test.

Nan ta entre dos pa tres test cu no ta barata, ya cu e tin un prijs minimo di 75 dollar. Kiermen un turista Mericano cu kier bin Aruba e mester paga entre 200 pa 300 dollar den test so. “Esaki tin consecuencia serio pa nos,” el a bisa. Nos industria di turismo ta sintiendo e efecto di esaki den e cancelacion cu ta tumando luga actualmente.

Vacuna

 

Segun e mandatario te ainda nan no a tuma un decision si lo bira un obligacion si nan lo bay condiciona na e turistanan cu ta bin Aruba cu mester tin e vacuna, prome cu nan biaha pa bin nos isla. Ya cu obviamente e tipo di exigencia aki ta bira un drempel pa pais Aruba.

Logicamente ta preferibel pa nan tin e vacuna pero te ainda nan no pensa cu esey lo ta un obligacion. Encuanto paspoort di e pandemia, el a indica cu esaki ta mas bien un tipo di verificacion si un biahero ta haci cualkier procedura relaciona cu e Covid, entre nan PCR test of vacuna.

Tampoco Aruba no ta bay condiciona esaki pa un turista, manera ta wordo poni mas ariba. Pero esaki no ta kita cu si un compania aereo of cualkier destinacion na momento cu bo biaha ta exigi bo mester haya bo vacuna. E mandatario a laga sa cu esaki no ta den man di gobierno di Aruba. E unico condicion cu nos tin te aworaki ta e CPR test cu ta wordo haci prome cu bo ta bin Aruba. Of ora cu e biahero ta yega nos aeropuerto prome cu bo ta drenta nos isla.

Di otro banda minister di Salubridad Publico, Dagui Oduber bistiendo su pechi di minister di Turismo a bisa cu si eventualmente nos lo por suministra e vacuna contra Covid gratis te hasta pa nos bishitante, esaki lo bira un bon oportunidad pa Aruba pa explora algo asina.

Manera ta sosodiendo na estado di Florida, caminda nan a bin cu un tipo di turismo di vacuna, caminda no solo nan residentenan pero tambe nan bishitantenan por wordo vacuna gratis y sin restriccion.

Sinembargo e mandatario ta haya cu prome cu nos por considera pa explora algo asina, nos mester percura den todo caso cu henter nos poblacion por a haya e vacuna aki. “Esey pa nos ta primordial,” el a declara.

 

 

 

LEAVE A REPLY

Please enter your comment!
Please enter your name here