Ayera minister di Husticia Arthur Dowers a declara cu companianan di vehiculonan electrico manera e-scooter y e-steps cu no ta cumpli cu exigencia di gobierno pa kita esakinan for di caminda publico lo por enfrenta un multa di 500 pa cada vehiculo. Esaki ta e movida mas recien di gobierno den e asunto andando tocante uso comercial di vehiculonan electrico.

Segun minister Dowers a afirma den un entrevista cu otro medio di comunicacion, a manda carta na companianan di e-scooter y e-steps ayera cu si nan no cumpli cu kita e vehiculonan aki for di caminda publico, lo entrega un dwangsom di 500 florin pa cada vehiculo cu detecta banda di caminda.

E carta aki a sigui varios otro cu a ser manda den pasado, unda gobierno repetidamente a manda aviso na companianan pa cumpli cu orden di gobierno. Segun e mandatario ta splica, gobierno a duna e companianan aki varios oportunidad pa ordena e asunto aki den cuadra di ley, pero te awor ainda tin varios compania cu no ta cumpli. “Nos a manda un prome carta pidiendo pa retira e steps. Ora abogado a interveni, nos a manda un otro carta. Despues, e di dos carta a sigui, informando cu e actividad tabata ilegal y cu mester stop di pone e aparatonan aki riba caminda publico. Nan a scoge pa no cumpli,” a cita Dowers bisando.

Mirando e controversia cu a surgi despues cu gobierno a anuncia na april cu lo cuminsa kita vehiculonan electrico for di caminda, e mandatario ta anticipa cu e companianan concerni lo probablemente hiba e caso back den corte.

Resumen di e asunto

Kisas por a corda ainda e reaccion fuerte for di companianan di vehiculonan electrico na e decision abrupto di gobierno pa deshaci di vehiculonan electrico, caminda a opone e medida pa via cu no a avisa di antemano cu lo tuma un paso severo asina. Pa via di esaki, dos compania a lanta caso contra gobierno pidiendo hues pa anula e medida pasobra gobierno no a sigui proceso administrativo adecua pa prohibi e vehiculonan aki.

E caso a ser treci dilanti pa Evikes Corporation VBA y Friendly Green Bikes, dos negoshi cu ta opera step, scooter y bicicleta electrico riba e isla pa varios aña. Durante audiencia den corte na comienso di mei, abogadonan di e companianan aki a argumenta cu nan tin varios aña ta opera riba e isla sin ser avisa pa gobierno cu nan negoshi ta ilegal. Tambe nan a enfatisa cu no a ricibi ningun notificacion oficial prome cu minister Dowers a anuncia e retiro di vehiculonan electrico.

Segun e companianan a argumento, gobierno no por cera abruptamente negoshinan cu el a tolera pa añas sin duna aviso anterior of duna nan un oportunidad pa responde. E companianan e subraya cera nan operacion ta trece varios Riesgo.

Segun un doño a conta corte e tempo ey, nan a dedica varios aña na obtene permisonan necesario y a haci inverti hopi placa den su negoshi. Tambe a splica cu e negoshinan tin 13 empleado den total, pues un prohibicion riba e vehiculonan aki ta menasa trabao di personal.

Ademas a pone enfasis riba e hecho cu gobierno semper a tolera e negoshi di vehiculonan electrico, unda e companianan a conta cu nan a hasta haya encurashamento di ministernan anterior riba mobilidad electrico como un negoshi atractivo den sector di Turismo.

Di su parti, gobierno a argumenta cu e asunto ta trata mas bien di seguridad publico y cu e medida no tabata directamente dirigi pa stroba e dos negoshinan aki. Den su argumento, gobierno a enfatisa e aumento di accidentenan creciente cu e tipo di vehiculonan aki den area di Palm Beach. Cu esaki a presenta potretnan di turista coriendo e vehiculo electrico iresponsablemente, cual ta crea peliger no solamente pa nan, sino tambe pa esnan coriendo auto den e area.

Ademas tabatin e problema cu supuestamente varios operador no tabatin permisonan necesario. Gobierno a argumenta cu e vehiculonan aki ta considera como vehiculonan di motor bao ley existente, cual ta nifica cu mester registra nan, nan mester haya inspeccion regularmente, mester tin plachi di number y otro permiso prome cu por usa nan riba caminda publico. A argumenta cu e companianan tabata viola disposicionnan di e Algemene Politieverordening door di pone e vehiculo y stacionnan di carga riba tereno publico sin permiso causando molester y obstruccion den espacionan publico.

Na final, corte a dicta den gran parti na fabor di e companianan. Den su sentencia, hues a enfoca riba si gobierno tabatin autoridad legal pa impone prohibicion inmediatamente, si gobierno a sigui procedura legal pa cu esaki y si e companianan mester a haya aviso prome cu anuncia e medida.

Den su veredicto, corte a bisa cu aunke gobierno tin autoridad pa implementa leynan di trafico, e mester cumpli prome cu e proceso administrativo rekeri pa ley, manera emiti decisionnan formal—no via entrevista manera e minister a haci—y duna companianan oportunidad pa responde prome cu confisca nan propiedad. Hues su decision no ta elimina e capacidad di gobierno pa regula e tipo di vehiculonan aki of aplica cumplimento di ley di trafico. Autoridadnan ta keda liber pa impone boet, sancionnan administrativo of otro penalidadnan si tin un base legal apropia y si a sigui e procedemento exigi. Usuarionan di stepnan cu comete infraccionnan di trafico tambe por ser persigui.

Cu veredicto di hues, gobierno ta keda obliga pa duna e companianan tempo pa por regla e asunto. Sinembargo, ta parce cu e mandatario ta determina pa kita e vehiculonan for di caminda y ta keda pone presion riba e companianan ki cu cartanan manda.

Mirando cu e companianan ainda no ta cumpliendo cu mandato di gobierno, minister Dowers a afirma ayera cu lo evalua si implementa un multa di 500 florin ta necesario. Mester enfatisa cu e ultimo carta manda no ta un medida oficial, sino un advertencia cu gobierno lo tuma pasonan mas severo si no tin cumplimento.

For di e companianan te awor no a tende ningun reaccion riba e minister su ultimo declaracionnan.