(AFP)— Kylian Mbappe a marca dos gol y Michael Olise a hunga un partido sobresaliente mientras Francia a vence Suecia 3-0 na Mundial diamars y a sigura un partido den ronda di 16 contra Paraguay.
Mbappe a cera un hugada espectacular pa habri e marcador poco prome cu mitar tempo den e partido di ronda di 32, observa pa 80.663 espectador na stadion MetLife na New Jersey, despues cu Francia ya a dal e tubo dos biaha — un biaha pa Mbappe y un biaha pa Olise.
Francia a domina e partido di principio te fin contra un equipo Sueco limita, cu hopi mas posesion di bala y intento pa gol.
Olise a prepara e di dos gol pa delantero di Paris Saint-Germain, Bradley Barcola, den e di 53 minuut, y despues a duna un pase magnifico pa Mbappe completa e victoria convincente.
Cu su dos gol, Mbappe a iguala Lionel Messi cu seis gol den e lucha pa e premio di maximo goleador di e Mundial.
E capitan di Francia awor tin un total di 18 gol den Mundial, un menos cu e record general di 19 gol di Messi — un marca cu Mbappe, di 27 aña, lo keda persigui.
El a celebra su prome gol door di core bay brasa entrenador Didier Deschamps, kende a perde Francia su ultimo partido di fase di grupo contra Noruega pa bay cas pa e entiero di su mama.
Deschamps lo retira di su puesto na final di e competencia despues di 14 aña hopi exitoso cu e seleccion Frances.
Keda elimina den ronda di 32 lo tabata un despedida hopi decepcionante pa Deschamps, kende tabata capitan di e prome equipo Frances cu a gana Mundial na 1998 y despues a hiba nan na otro titulo como entrenador na 2018.
Na 1998, Francia su caminda pa e campeonato na cas a inclui un victoria di 1-0 riba Paraguay den ronda di 16, ora Laurent Blanc a marca e gol di oro den tempo extra.
Les Bleus lo enfrenta e Sur Americanonan atrobe den ronda di 16, diasabra na Philadelphia.
Ta anticipa cu Francia lo gana e partido y sigui avansa den e torneo.
