Diadomingo ultimo, Pueblo di Aruba tabatin e oportunidad pa despedi di Sr. Harry Croes, un gran Arubiano y un gran Baluarte di Pais Aruba. Durante e anochi tabatin presentacion musical di diferente Gruponan Tipico y canto. Durante e ceremonia oficial Minister President Evelyn Wever-Croes den nomber di Minister Xiomara Maduro y Minister Endy Croes a hiba palabra.
Mandatario di Enseñansa y Deporte ta conbibi e momentonan doloroso aki cu e famia pa cu e perdida di Harry. Pueblo di Aruba a wordo conmovi cu e tristo noticia cu Sr. Harry Croes a bay laga nos. Pakico, paso Harry ta un hende di tur hende. Poco anecdota, riba 15 di october, Harry lo a cumpli 75 aña. Y pakico mi ta corda esaki, comokiera ta e fecha natal di mi kerida mama den feliz memoria y awe e lo a cumpli 82 aña. P’esey riba e fecha aki nos tin comunicacion y ta recorda Harry. Conociendo e trayecto di Harry e ta pone nos pensa; e Harry di dande, e Harry di cultura, e Harry di cancionnan di Himno & Bandera, e Harry di prensa, entre otro, Matutino Diario, Top FM y Solo di Pueblo. E Harry amigo di Betico Croes cu conoce e lucha di Status Aparte y strategia den su planta di man. E Harry consehero di Nelson Oduber. E Haryy cu ta aporta na lantamento di e bandera di mas grandi di Aruba tur 17 di maart pa 12 meyanochi pa asina nos inicia e dia festivo. E Harry den deporte y e Harry cu su amigonan di domino. Pues, Harry tin un trayecto masha largo.
Un poco di e trayecto di Sr. Harry Croes den deporte:
Harry desde mucha tabata hopi activo. Durante su hubentud Harry a practica baseball, futbol y softball. Harry tin un pasion pa futbol y a hunga cu ekiponan, entre otro, Sportboys, Union y SV Trappers. Despues, Harry a bira referee di Aruba Voetbal Bond y a fluit weganan no solamente local, pero tambe internacional. Harry tabata stima boxeo. Cu edad di 16 aña Harry a bringa su prome pelea amateur contra Hector Cristina y a sali ganado. Harry a bringa den amateur diferente pelea y pelea profesional. Despues Harry a desaroya su mes y a traves di Sr. Roy van Putten den feliz memoria, Harry a drenta den conexion cu World Boxing Council (W.B.C) y a bira un referee y hues internacional pa boxeo. Harry a biaha rond di mundo a para hues y referee den peleanan di titulo na e siguiente pais nan: Argentina, Las Vegas, Aruba, Belfast, Colombia, Curaçao, Guyana, Guadalupe, Haïti, Japon, Jamaica, Martinique, Merca, Mexico, Tailandia, Trinidad, Panama, California y Venezuela. Un total di 17 pais cu ta algo historico, cual ta poco hende na Aruba. Kisas e unico hende cu a logra esaki riba un taya asina halto. Minister Endy Croes a gradici e famia di Harry na su esposa Ligia, yiu-, nieto- y rumannan pa por a presta Aruba Harry na asina tanto organisacion y pa e trabou y labornan bunita cu Harry a eherce. Di curason den nomber di Gobierno di Aruba nos kier gradici Harry pa tur loke cu e la haci pa Aruba den su totalidad. Sinti boso orguyoso di tabatin un tata, esposo, welo, ruman hopi respeta y stima na Aruba.
Pa termina, manera tur artista ariba un escenario y escenario aki cu el a presenta hopi biaha den su festivalnan di dande. E elogio y aprecio di un artista ta e aplauso cu e publico ta honra ora e ta riba un escenario. Laga nos honra Harry cu su ultimo aplauso como un artista cu a significa hopi pa Pais Aruba. Danki pa tur cos Harry y un aplauso grandi pa nos amigo Harry!
