Minister Endy Croes ta atende reunionnan hunto cu ministernan di Hulanda, Corsou y Sint Maarten

A reuni cu DEA pa prepara pa e Vierlandenoverleg cu ta tuma luga na Corsou

Recientemente, Minister Endy Croes a reuni cu directora di Departamento di Enseñansa Aruba, Sra. Anne Marie Proveyer y directora suplente, Sra. Sheila Maduro.

Durante e reunion a dialoga tocante diferente topico relaciona cu e Vierlandenoverleg e.o.: Studie Succes, Platform Hoger Onderwijs, Stimuleringsfonds, Stimuleren Lerarenopleiding (Kibrahacha), Examens, Nederlands als Vreemde Taal, Studiefinanciering, Samen Gezond y Studering in de Regio. Sra. Proveyer y Sra. Maduro ta acompaña Minister Endy Croes na e Vierlandenoverleg cu ta tuma luga na Curaçao dia 15 pa 17 di januari 2023.

Secretario di Estado pa Enseñansa sra. Gunay Uslu hunto cu Ministerionan di Enseñansa di Reino Hulandes tambe lo ta presente durante e reunion anual aki, esta Minister di Enseñansa di Hulanda Sr. Robbert Dijkgraaf, Minister di Enseñansa di Sint Maarten Sr. Rodolphe Samuel y Minister di Enseñansa di Curaçao Sr. Sithree van Heydoorn. Durante e Vierlandenoverleg ta dialoga riba e topiconan di gran importancia pa cada pais, segun e necesidadnan y interes comun. Ta haci palabracion concreto encuanto intercambio di data, como tambe colaboracion bilateral of conhunto di proyecto y iniciativanan cu ta beneficioso pa e paisnan den reino.

Minister Endy Croes y Depertamento di Enseñansa a prepara debidamente riba cada punto, pa di e forma aki ta riba mesun liña y bringa pa loke nos ta kere aden durante e Vierlandenoverleg.