Minister di Asuntonan Economico, Comunicacion y Desaroyo Sostenibel, Geoffrey Wever, a sigura den un conferencia di prensa ayera mainta cu parti di nan maneho ta pa nan ta mas inclusivo, cual no ta nifica solamente e consumidor of e comerciante, sino tur hende esun cu mester tin participacion den economia.

El a enfatisa cu tur hende tin e derecho pa bay dilanti y haya parti di economia loke ta nifica tambe cu “consumidor mester sa kico su derechonan ta. E mester ta bon informa pa ora e cumpra un producto of e haya un servicio, e sa kico su derechonan ta pa e por ta critico.”

Minister Wever ta considera cu ta importante pa duna na e consumidor den e rol aki e hermentnan necesario “y a nos como gobierno nos mester yud’e cu esey, nos sa cu hopi persona no sa con pa actua si bo no ta conforme cu su expectativanan.”

Pa e motibo aki, nan a dicidi di traha un website nobo www.sedeco.aw pa tur consumidor por haya miho informacion na unda cu minister Wever a splica cu nan a prepara e website aki hunto cu Servicio na Defensa di Consumidor (SEDECO). Riba e website tin diferente informacion, como por ehemplo, documentonan cu e por usa si tin algun tipo di conflicto como consumidor.

“Esaki ta parti di diferente trabounan cu nos ta haciendo pa fortifica e posicion di e consumidor, di cada ciudadano como consumidor y nos a dicidi awe di lansa e website informando cu tambe ta den proceso di un campaña di marketing caminda continuamente nos lo informa comunidad y consumidor di su derechonan via videonan, con pa actua y con e por proteha su mes,” el a bisa.

Tambe nan a cuminsa cana e caminda na unda e consumidor por entrega un keho y por haya ayudo tambe: “aworaki pa bo cuminsa un caso, e ta un caminda hopi largo pa cana; e ta tarda, e ta costa hopi placa y tin necesidad pa tin un luga pa consumidornan por entrega un keho na un forma mas eficiente y si mester di veredicto, pa duna nan derecho.”

Juright Tromp, ken ta fungi como Chef Consumentenzaken na SEDECO, a splica cu den cuadro di reorganisacion pa pone mas enfasis riba e consumidor, nan a sinta hunto cu minister Wever na unda esaki ta e prome paso di lansamento di e website pa asina ey duna informacion na comunidad.

Riba e website por entrega un keho, loke ta representa e acceso pa e consumidor. Tambe si tin caso pa huurcommissie cu mester wordo entrega, el a conta cu tambe por haya diferente servicio cu e departamento ta brinda como conseho huridico. Tambe por pidi pa caso di inscripcion den casonan di huur of prijs. Ademas di esey tin diferente documentonan cu e consumidor por usa na e ora di entrega un keho.

Te na e momentonan aki, e website ta na idioma Hulandes. Minister Wever a splica cu e di dos paso ta bay ta su version na Papiamento cu ta bay wordo acompaña di un campaña di marketing manera el a sigura caba, esaki pa motibo cu den comunidad tambe tin hende como esnan di 60 aña bay ariba cu no ta haya e acceso pa un computer facil y pa por haci uso di e website.

Pa cu esaki, minister Wever a sigura cu nan ta compronde tin ora cu ta complica pa bay riba un website. E idea ta cu esaki ta bay sali door di e campaña cu videonan cu nan ta bay resalta cada elemento di derecho di consumidor “y echt purba di conscientisa y educa tur ciudadano na Aruba, no solamente 60+, sino mi ta kere tin otro grupo tambe cu kisas e materia aki ta complica pa nan y e idea ta pa nos trece den un forma hopi mas accesibel y asina nan por compronde mas miho.”

Masha poco infraccion tin pa loke ta trata prijsnan di canasta basico

Den otro topico, minister Wever a sigura cu pa loke ta trata canasta basico, tin productonan cu gobierno ta regula y den esey tin un control tur dia den tur supermercado y mini-market, manera el a sigura: “tin un inventario completo y di e resultado ey di miles di control cu ta wordo haci, masha poco infraccion tin pa loke ta trata canasta basico.”

Tambe el a sigura cu algun luna pasa, nan a amplia e ley pa den caso aki nan por impone boet na esnan cu no ta cumpli cu esaki. E maneho nobo di boet ta den proceso pa asina ey por pone mas presion, “pero mester bisa si cu supermercadonan basa riba e data cu nos tin, tur ta casi cumpli cu e beleid di rekisitonan.”

Den e parti di productonan cu ta liber pa comerciantenan determina e prijs, minister Wever a sigura cu nan no tin influencia riba esey pero nan si ta monitoria otro cos, como por ehemplo, si tin e prijs poni of loke a pasa recientemente cu algun supermercado cu tabata bende saconan di aros cu no tabata oficial, “tur e tipo di controlnan ey ta tumando luga,” el a finalisa.