Minister di Asuntonan Economico, mr. Geoffrey Wever, a tene un reunion cu Bureau Krediet Registratie (BKR) na Hulanda. Sr. Peter van den Bosch, kende ta e CEO di Stichting BKR, a comenta riba e hecho cu na Hulanda ya caba tin registracion di credito y comparticion di informacion tumando luga boluntariamente entre mayoria instancia financiero, mientras awo numa ta formalisando legislacion. Na Aruba a logra pasa e ley cual ta e fundeshi pa por cuminsa cu e proceso di structura e registracion apropiadamente.

Minister Geoffrey Wever a splica cu awo cu tin e cuadro legal, e proceso di implementacion di e krediet regristratie stelsel ta canando su caminda, pa cual e reunion cu BKR tabata na su ora. E mandatario a indica di tin bon comunicacion y cooperacion cu BKR, kende tambe ta dispuesto pa brinda asistencia na Aruba pa e implementacion di su krediet registratie stelsel, algo cu na Hulanda ta existi ya for di aƱa 1965.

Datos na Aruba ta mustra cu 3 for di 10 cas tin mas debe compara cu nan entrada. Debenan excesivo por resulta den problemanan grandi social-economico pa famianan, cu su efectonan pa comunidad henter. Prevencion di practicanan di extende credito (excesivo) sin controla e persona su abilidad pa paga bek ta necesario.

Door di no tin informacion necesario ta trece cune tambe riesgo adicional pa tur banco of instancia di credito. Un sistema di control di credito ta duna e banco of instancia mas seguransa cu e persona cu ta fia placa tin e abilidad pa paga bek, pues, menos riesgo p’e. Importante ta tambe cu e sistema aki lo proteha e consumidor tambe di hinca su mes den compromisonan financiero cu despues ta bira dificil pa cumpli cu nan, y esaki tin tur sorto di consecuencia negativo pa nos hogarnan y nos famianan.

Na mes momento, e ley pa un krediet registratie stelsel tambe tin di haber cu proteha e consumidor su informacion. Esaki ta un di e puntonan di salida importante pa minister Wever. Un base legal pa structura intercambio di informacion na un forma sigura tabata necesario, pa asina e instancia tin su seguransa, pero tambe mester garantisa e consumidor cu su privacidad ta protehi.

Minister Geoffrey Wever ta agradecido na Sr. Peter van den Bosch y BKR pa un reunion fructifero, y nan disponibilidad pa yuda Aruba implementa un sistema di registracion di credito.