Minister di Finanzas, Asunto Economico y Sector Primario, mr. Geoffrey Wever (Futuro), ta anuncia e introduccion di un maneho nobo di incentivonan fiscal, cu tin como meta pa stimula e desaroyo economico di Oranjestad y San Nicolas, cu a drenta na vigor 1 januari 2026.

Oranjestad y San Nicolas, tin un potencial grandi cu te ainda no ta wordo utilisa optimalmente. Tin hopi edificio bashi y bandona. E incentivonan fiscal nobo tin como proposito pa stimula doñonan di edificio cu awo ta bashi of den mal estado pa renoba nan edificionan of pa bende e edificionan na un persona cu si kier renoba e edificio y si nan haci esaki nan lo ricibi un serie di incentivonan fiscal.

Segun minister Geoffrey Wever: e incentivonan fiscal temporal ta pa e centro di Oranjestad y San Nicolas y ta drenta na vigor 1 januari 2026 y ta inclui, entre otro, un “vrijstelling” di winstbelasting y dividendbelasting pa un periodo di dies aña, y tambe un “vrijstelling” temporal di overdrachtsbelasting, belasting riba bedrijfsomzetten (BBO) y bestemmingsheffing AZV relaciona cu e renobacion y benta di edificionan. E inversion mester tuma lugar den e proximo dos añanan. Cu e incentivonan fiscal, e costo inicial di inversion ta baha y e factibilidad financiero di e renobacion di edificionan ta mehora y e peso di belasting ta baha y asina ta haci e inversion den edificionan den e centro di Oranjestad y San Nicolas mas atractivo.

E incentivonan fiscal ta aplicable si tin un inversion di por lo menos Afl. 500.000. Pa inversionistanan cu no por haci uso completo di e regimen di “vrijstelling”, tambe tin e posibilidad di afschrijving arbitrario di gastonan di desaroyo y renobacion, permitiendo cu nan tambe por contribui activamente na renobacion di edificionan den e centro di Oranjestad y San Nicolas.

Cu e introduccion di e maneho fiscal nobo aki, Gobierno AVP-FUTURO ta crea un clima di inversion cla y transparente pa e centronan historico. Door di uni gobierno y sector priva, ta stimula cu e centro di Oranjestad y San Nicolas ta wordo revitalisa y cu e edificionan por wordo usa pa vivienda, restaurant, café, oficina y retail.

E maneho ta di acuerdo cu e Programa di Gobernacion AVP-FUTURO 2025–2028 y ta sigui e recomendacionnan di e “Commission Economic Recovery 2023”, un comision cu Minister Wever a institui y lidera pa bin cu incentivonan fiscal consistiendo e tempo ey di KVK, ATIA, AHATA, Freezone, DEZHI, diferente abogado, diferente fiscalista y diferente accountant.

“Mi ta sumamente contento cu e incentivonan fiscal a keda cla y a drenta na vigor 1 januari 2026 y mi ta spera cu sector priva haci bon uso di esakinan pa asina hunto nos revitalisa e centro di Oranjestad y San Nicolas, cu ta un prioridad di Gabinete AVP-FUTURO y asina nos ta demostra cu nos gobierno ta cumpli cu e compromiso cu nos a haci cu pueblo di Aruba y cu pronto nos lo wak e centro di Oranjestad y San Nicolas revitalisa”, segun Minister Geoffrey Wever.