Recientemente, minister di Labor, Integracion y Energia, Glenbert Croes a reuni cu gremionan comercial. Den declaracionnan comparti riba su pagina di Facebook, e minister a destaca desaroyonan relaciona cu prijs di coriente y awa.

Minister Croes a cuminsa gradiciendo Camara di Comercio (KvK), ATIA, AHATA y CUA pa nan iniciativa di dialogo. Tambe a gradici WEB, Elmar y Utilities “pa ta, como empresa di gobierno, di pueblo, di estado, habri pa duna tur informacion”.

Croes a indica cu ta “fastioso” e situacion cu mester a aumenta prijs di awa cu coriente, sinembargo, a indica cu mirando desaroyonan den mercado, cu e aumento aki tabata temporal. “Nos ta premira cu e prijsnan di awa y coriente lo baha back, dunando espacio claro na WEB y Elmar pa recupera un poco di e sla cu nan a haya door di absorbe e aumentonan [di prijs di petroleo] durante siete luna.” Croes a bisa cu ta compronde cu e empresanan estatal aki a yega na e limite di loke nan por absorbe, y cu mester busca e balans, pasobra pueblo y economia di Aruba ta bay paga esaki.

“Den e seis luna di evaluacion aki riba e futuro structura di tarifa, Dios mediante compaña pa prijs di petroleo hopi miho unda cu lo por reduci esaki pa nos comunidad.”

Minister Glenbert Croes tambe a anuncia cu ta bay tuma contacto cu Merca pa sondea e posibilidad pa por cumpra Heavy Fuel Oil for di Venezuela.

“Tambe mi a duna nan e noticia cu proximamente mi ta bayendo cu gobierno di Merca, pa nos pidi gobierno di Merca, OFAC y Departamento di Energia di Merca e aprobacion pa nos por cumpra Heavy Fuel Oil (HFO) cu WEB ta usa di origen di nos bisiñanan, specificamente di Venezuela. Pasobra na e momento nos ta pagando prijs di HFO caro, otro islanan den Caribe ta cumprando HFO por ehemplo di origen Venezolano hopi mas barata.”

El a indica cu e descuento aki por traduci pa pueblo, pa comunidad, y esey ta un esfuerso cu gobierno ta haciendo. P’esey ta bay pidi OFAC pa “den interes di Aruba, den interes di nos economia, den interes di nos pueblo, den interes di baha prijs di awa cu coriente, permiti nos cumpra HFO di origen Venezolano pa nos por baha prijs di awa cu coriente na Aruba. E ta den interes general”, Croes a splica.

 

LEAVE A REPLY

Please enter your comment!
Please enter your name here