Home Local Minister: Grupo di trabou pa studia uzo di Hulandes den examen casi...

Minister: Grupo di trabou pa studia uzo di Hulandes den examen casi cla

256

E grupo di trabou pa studia e fenomeno cu a haya atencion recien tocante Hulandes den examen cual lo ta formando un barera pa miho resultadonan ta ‘casi cla’ segun minister di enseñansa pa por trece un conseho durante proximo aña escolar.

Segun minister di enseñansa Rudy Lampe (ReD), tin diferente factornan cu ta conduci na un porcentahe abou di studiantenan cu a slaag. Pa e ministerio si tin cosnan cu por mehora ‘nos lo percura pa drecha cosnan unda cu por’. Di e porcentahenan por mira cu por ehempel Colegio Arubano ta basta atras den su porcentahe mientras Filomena College tin e porcentahe mas halto riba nos isla.

Un di e factornan cu lo ta posiblemente liga na e resultadonan abou ta cu manera ta conoci tin e factor cu den materianan exacto of economico ta uza examennan directamente di Hulanda cual segun sr. Lampe ta ‘hopi taalig’. Asina por mira cu den examen di kimica por ehempel tin situacionnan unda pa via di no a skirbi e nomber precisamente den Hulandes corecto esaki ta conta como fout maske e examen no ta trata dominio di Hulandes.

“Si bo a haci examen den kimica bo kier nan evalua bo en berdad a base di bo conocemento di e materia y no a base cu bo ta domina Hulandes bon of no. E manera con despues di aña examennan ta contene idioma hopi complica mientras den nos comunidad e uzo di Hulandes a bay atras ta algo cu nos tin cu acepta como realidad.”

E mandatario di enseñansa a haya importante pa cuminsa studia e caso aki mirando cu por considera cu e no ta husto cu ta cualifica studiantenan a base di un idioma cu dia tras dia ta bayendo atras, ‘y ta muriendo’ manera e docente di Hulandes Arnoud Kuijpers a yega di señala den pasado.

Un grupo di trabou lo haci sondeonan riba e topico aki y aunke tabatin dificultad pa haya personanan cu kier asumi e responsabilidad aki segun minister, ‘nos ta casi cla’. Den e proximo aña escolar lo bin un proposicion riba con lo ta e miho paso pa tuma mirando e situacion.