Gobierno Hulandes a anuncia ayera cu lo duna un ‘linea di bida’ pa compania di aviacion nacional KLM di 3.4 biyon euro, pa yuda e aerolinea sobrevivi e caida den aviacion causa pa pandemia di coronavirus.
Minister di Finanzas, Wopke Hoekstra a bisa cu e pakete di sosten ta consisti di un prestamo di 1 biyon euro y 2.4 biyon euro den garantia pa prestamo di banco.
Tin condicion mara na e placa, cu gobierno poniendo condicionnan incluyendo cu KLM mester baha gasto cu 15%, mehora sostenibilidad di e aerolinea y reduci e cantidad di vuelo nocturno cu ta tuma luga na e aeropuerto nacional Schiphol, pafo di Amsterdam.
Hoekstra a bisa cu e orden di corta gasto ta nifica cu perdida di trabou na e compania cu ta duna trabou na alrededor di 30mil persona ta ‘probablemente inevitabel’.
CEO di KLM, Pieter Elbers a bisa cu e pakete tabata necesario pa yuda KLM recupera di e crisis cu a tene alrededor di 90% di su avionnan na tera durante e pandemia global. Aerolineanan rond mundo ta pronostica di perde $84 miyon e aña aki, cu revenue na mita.
“Esaki ta un stap hopi importante y mi ta expresa mi gratitud den nomber di tur colega di KLM na estado Hulandes y e banconan pa nan confiansa den nos organisacion y nos futuro”, Elbers a bisa den un declaracion.
E acuerdo ta inclui nombramento di un ‘agente estatal’ pa supervisa con ta gasta e pakete y sigura cu KLM cumpli cu e condicionnan.
KLM ta den un asociacion cu aerolinea Frances, Air France. Gobierno Frances a priminti 7 biyon euro den prestamo y garantia di prestamo na e aerolinea.
E anuncio Hulandes a bin un dia despues cu accionista di aerolinea Alena, Lufthansa a aproba un pakete di rescate di 9 biyon euro cu lo mira gobierno Aleman tuma un accion di 20%, despues cu management a bisa nan cu e aerolinea tabata kedando sin placa y tabata enfrentando añanan di reduccion den demanda pa biahe aereo.
Gobierno Hulandes a bisa cu e pakete mester wordo aproba prome pa Comision Europeo. “Nos ta spera cu esey lo pasa den proximo dianan”, Hoekstra a bisa.
