Ayera, durante un conferencia di prensa cu Minister di Enseñansa, Ciencia y Desaroyo Sostenibel, Armando Lampe a ofrece pa e medionan local, el a papia riba varios topico por ehempel, independisacion di MdC, presentacion di buki na Papiamento pa muchanan di scol preparatorio, y asina mes Sustainable Education Symposium (SES), cu lo tuma luga otro siman na Cas di Cultura.
El a duna di conoce cu su persona a propone diabierna pasa den Conseho di Minister pa inicia un proceso di independisacion di Centro Multi Disciplinario (MdC), pa haci esakinan independiente bou guia di Minister Presidente Evelyn Wever-Croes como Minister di Asuntonan General cu ta regarda personal, mirando cu ta un asunto di Departamento di Recursonan Humano cu ta bay atende cu henter e proceso aki.
Di otro banda, Lampe a informa cu a cuminsa e aña escolar nobo cu e anuncio cu tur scol preparatorio den prome aña ta cuminsa cu Scol Arubiano Multilingual. Esey kier men cu Papiamento inicialmente ta bira e idioma di instruccion.
El a presenta e buki principal cu tur scol lo cuminsa uza e aña aki, cu ta yama ‘Bijbel di Prenchi’. Esaki ta skirbi specialmente pa muchanan di 4 pa 7 aña, pero adultonan tambe por haci uzo dje y lo bay bira e buki mas importante di scol preparatorio dentro di e plan di Scol Arubano Multilingual, segun Lampe a señala.
Lampe a comenta cu e mayoria di pueblo Arubiano ta di religion Cristian, pero tambe lo bay uza e buki aki den scolnan publico, pa motibo cu e biblia ta e buki mas lesa den historia di humanidad.
Den e conferencia di prensa tabata presente Swinda Maduro-Schwengle y Selvia Lumenier, e personanan encarga di traduci e buki ey na Papiamento, cual Corsou tambe a adapta lunanan pasa.
Ademas, Lampe tambe a presenta e edicion number ocho di Sustainable Education Symposium Aruba 2019 (SES), cu representacion di Ronny R. Alders di Biblioteca Nacional di Aruba. El a splica cu esaki lo bay tuma luga na Cas di Cultura desde dia 4 te 7 di september, un anochi di lectura cu e tema ‘hofi di bario’, unda scolnan lo bay participa cu sostenibilidad cu e tema di Community Garden, unda manera un ehempel, otro paisnan ta haci uzo di espacio publico pa plantacion di mata.
“Mirando cu e hofi di bario tin un interes grandi pa plantacion, esaki ta e momento pa stimula den e muchanan e amor pa agricultura”, Lampe a expresa.
