Algun dia pasa a cambia di nomber un di e camindanan cu mas transito na Aruba, cu tabata Sasakiweg y asina duna honor na e politico Nelson Orlando Oduber. Riba rednan social a aprecia tur comentario negativo of positivo pa cu esaki y di mesun manera a scucha como contrapropuesta e nomber di Oscar Henriquez, kende tabata e persona cu, hunto cu Juan Enrique Irausquin, a contribui cu industria di turismo na Aruba.
Mirando cu hopi ciudadano tabata puntra pakico no a tuma e oportunidad pa honra Henriquez, Bon Dia Aruba a haya e ocasion pa puntra Minister di Infrastructura, Medio Ambiente y Desaroyo Teritorial, Otmar Oduber si gobierno tin plan pa haci un reconocemento pa Oscar Henriquez. El a splica cu mester duna merito pa esunnan cu a traha den pasado.
El a menciona cu Oscar Henriquez ta reconoci como un pionero dilanti di Hotel Talk of Town, den e monumento dedica pa e 50 pionero di Aruba pa loke ta trata turismo y Henriquez ta un prominente riba nan, cu un reconocemento cu a bay caba pa su persona; pero esey no ta basta pa un persona cu a traha y cu a dedica nan bida na desaroyo di e pais.
Tambe el a comenta cu Henriquez, hunto cu Juan Enrique ‘Juancho’ Irausquin, tabatin un vision pa loke ta trata e prome hotel Caribbean na Aruba y tocante e discusion cu tabata coriendo den rednan social, cu si un persona ta merece mas cu otro, ora un persona ta mira e trayectorio di Nelson Orlando Oduber y proyectonan cu a logra bou di su persona, ‘mi ta kere cu tin espacio pa reconocemento pa tur hende’, Oduber a conclui.
