Minister lo nombra un management team pa reemplasa director Staring temporalmente

Minister Dangui Oduber (MEP)

Minister di Salud Publico Dangui Oduber (MEP) a dicidi di reemplasa director di Departamento di Salud Jerry Staring cu un management team temporalmente te ora e investigacion interno ta duna mas claridad. 

Tin un gran cantidad di kehonan di personal di e departamento concerni. Sindicato Topa a conduci un investigacion pa midi e satisfaccion bou personal. Esaki a mustra cu tin mal maneho di parti di e director Staring como cu e no tin suficiente conocemento. Tambe su stilo di maneha no ta wordo aprecia pa motibo di falta di comunicacion adecua. Mas cu 80% di e personal ta indica cu nan no ta contento na trabou cual ta directamente e resultado di e maneho di sr. Staring.

Segun e carta di Topa dirigi na minister Oduber, pa nan investigacion tabata representativo, 17 di e 170 trahado mester a participa. Pero na final 48 trahado a participa, 3 biaha mas cu tabata necesario.

Otro kehonan contra e director ta mal conducto (no etico). Tambe e director supuestamente ta uza intimidacion. El a kita diferente hefenan sin cu e plan di formacion nobo tabata cla. Esaki a resulta den diferente casonan den corte cu e director a perde finalmente. Un di e hefenan tabata e unico experto epidemiologico, esta Maribel Tromp. Bon Dia Aruba a skirbi varios biaha riba e caso aki cu e falta di e experto aki tin consecuencianan grave pa prevencion di entre otro malesanan contagioso na Aruba.

Tratamento preferencial di ‘vriendjespolitiek’
Un otro keho ta cu sr. Staring tabata guia e departamento y nombra personal a base di amistad. Tambe el a prohibi comunicacion entre cierto trahadonan. El a nombra personal cu no tabatin e cualificacionnan pa haci e trabou. Tin falta di personal na seccionnan crucial sin cu e director a tuma accion. Tambe tin kehonan, hasta di comerciantenan, cu tin ‘vriendjespolitiek’ den departamento di Higiena unda ta hasta ta acusa e hefe Yvette Geerman di mal uzo di badge di inspeccion pa asina laga famia drenta Aruba Summer Festival.

Bon Dia a puntra sra. Geerman over di acusacion aki. E no por a comenta mucho como cu e ta prefera di abstene di duna un aclaracion completo mirando cu tin e investigacion tumando luga. Pero si e ta nenga e acusacion di vriendjespolitiek y tambe di mal uzo di badge.

 

Investigacion interno ta cuminsa dialuna
Minister Oduber a bisa awemainta cu lo conducta un investigacion interno cu ta cuminsa dialuna proximo. Esaki lo tuma 6 siman pa verifica e kehonan. E nombramento di un management team temporal ta pa asina e personal sinti nan mes mas liber durante e investigacion, asina e mandatario ta splica.

Den e caso cu e kehonan ta resulta ta valido, lo cuminsa e proceso pa busca un director noba, sr. Oduber ta expresa. E ta enfatisa cu esaki no ta un caso cu hende di persecucion, como cu sr. Staring tabata coordinador di su predecesor, e minister di Salud Publico Alex Schwengle (AVP). E minister ta bisa cu el a traha 8 luna cu sr. Staring y te awor e no a ripara cu tabatin problema den departamento.

You May Also Like

Ministerio Publico

Ministerio Publico ta organisa competencia di requisitoria pa studiantenan di derecho na Aruba

Ministerio Publico hunto cu Corte Superior di Husticia, Universidad di Aruba (UvA) y Ordo ...

archivo nacional edificio (1).JPG

ANA lo presenta proposicion na gobierno pa edificio nobo

Actualmente algun trabou ta tumando luga den Archivo Nacional Aruba (ANA), cu nan servicio ...

Turismo a baha cu 11,9% te cu april

Ultimo cifranan di Aruba Tourism Authority (ATA) ta mustra cu e turismo ta sigui ...

perfil hoben delincuencia.jpg

Hobennan cu ta cay cera bek ta esunnan cu a haya ayudo limita

E profiel di hobennan cu ta cay cera mayoria di  nan tin entre 15 ...

Accion grandi na San Nicolas pa sterilisa cachonan di caya

E meta ta pa yega na sterilisa 400 cacho di caya, pero no ta ...

Harmony Supermarket

Beslag riba mas placa bankeronan ilegal: 1,2 miyon florin

Den e caso di bankeronan ilegal husticia a pone beslag riba mas placa, esta ...