Diahuebs, Minister di Finanzas, Xiomara Maduro a reuni cu sra. Vannesa Satur di United Nations World Tourism Organization (UNWTO) y ehecutivonan di Oficina di Estadistica (CBS) riba e trabounan cu a haci pa asina Aruba por conta cu un ‘Tourism Satellite Account’ (TSA). E TSA ta brinda nos informacion detaya di e impacto directo cu turismo tin riba e economia di nos Pais, cual ta yega na 20% di nos GDP.
Segun un comunicado di gobierno, e informacion compila den e TSA ta importante, ya cu e TSA banda di ta duna bista riba e tamaño y impacto directo di turismo riba nos economia, ta brinda informacion detaya di e consumo di nos bishitantenan, e oferta y e importacion necesario pa cumpli cu e demanda aki.
Maduro ta gradici sra. Satur y su coleganan di UNWTO y tambe tur e ehecutivonan di CBS pa e trabou importante aki pa Aruba. E TSA lo keda oficialmente publica na juni 2020, segun e comunicado ta finalisa.
