carta tereno minister oduber

Aki por mira un peticion pa tereno na escrito di parti minister Otmar Oduber dirigi na su colega minister Benny Sevinger cu a aproba esaki riba e mesun dia.

Aña pasa minister Oduber a pidi un tereno den bisindario di Tamarijn pa haci agricultura. E ta pidi su colega minister pa ‘intermedia’ pa asina e por continua su ‘pasion cu e tin desde chikito’.

E carta tin e fecha di 16 di november y por mira un stempel cu e mesun dia esaki a drenta cerca e minister di Infrastructura, Sevinger. Abou por mira un otro stempel di e minister aki hunto cu su firma y su comentario ‘akkoord. gaarne uw medewerking’. Tambe por mira cu minster Sevinger a firma riba e mesun dia, esta e 16 di november 2015.

Despues por mira cu e carta a bay BID cu ta e departamento encarga cu documentonan oficial (18 november) pa finalmente yega e departamento responsabel pa otorgamento di tereno, esta DIP (20 november).

Modus operandi
E procedura di otorga tereno ta critica pa motibo di falta transparencia pero tambe cu gobierno no ta trata tur peticion igual. Esaki no ta algo di e gobierno actual. Diferente investigacion den cuadro di bon gobernacion, manera esun di Algemene Rekenkamer y WODC, ya a mustra cu gobiernonan di Aruba ta faya den e parti di otorga tereno. Y ta uza esaki pa priviliga cierto gruponan a cambio di haya nan sosten (voto/financiero).

E minister actual di Infrastrura Sevinger tambe ta bou critica severo pa motibo di diferente caso recien cu ta indica faboritismo sea mal gobernacion. E caso di Ocean Z ta na Malmok unda el a cambia e destino di tereno di erfpacht, mientras tin un caso den corte andando di habitantenan protestando contra e cambio aki. Hues mester a interveni pa para e ehecucion di e decision dudoso di e minister. Despues e carta cu e peticion di Roberto Rincón, e empresario cu Merca a deteni riba sospecho di corupcion, a sali den prensa. Minister Seveninger tambe a firma e carta despues di un par di dia cu e famoso palabranan ‘gaarne uw medewerking’.

E minister a reacciona cu su palabranan aki y su firma no tin e balor den sentido cu el a aproba e peticion. Pasobra e responsabilidad aki ta keda den man di e departamento encarga, DIP. Sinembargo den su editorial Bon Dia Aruba a mustra cu esaki no ta e caso y departamentonan no ta cuminsa ‘core’ sin e ‘aprobacion’ aki di minister.

Parlamento no tabata convenci tampoco y a entrega un mocion di desconfiansa durante e tratamento di presupuesto cu tambe a haya voto di sosten di e presidente di parlamento Marisol Lopez (contra ‘su’ minister, ambos ta di AVP). Sra. Lopez a bisa Bon Dia despues cu mester bin cu un maneho drechi pa otorgamento di tereno cu awor ta falta

Awor Bon Dia a obtene un otro prueba di trato preferencial, den e caso aki di un colega minister. Mientrastanto tin un lista di espera grandi di ciudadanonan y comerciantenan cu a pidi tereno. Nan ta wardando añanan largo caba riba un decision.

 

 

 

LEAVE A REPLY

Please enter your comment!
Please enter your name here