ORANJESTAD – Diahuebs Minister di Desaroyo Teritorial, Infrastructura y Medio Ambiente sr. Otmar Oduber tabatin e placer di por a reuni cu Minister di Corsou encarga cu Trafico, Transporte y Desaroyo Teritorial sra. Zita Jesus – Leito.
Den e encuentro importante y sigur fructifero aki a trata diferente tema manera maneho di tereno y desaroyo teritorial, segun un comunicado di gobierno. Ambos Minister a intercambia informacion, reto y forma di traha. Locual cu a resalta ta e tremendo interes cu Minister Jesus-Leito tabatin riba e manera cu Aruba ta acerca diferente tema y a indica cu tin e intencion y deseo pa traha hunto cu Aruba pa regionalmente reforsa e maneho pa locual ta e diferente temanan relaciona cu desaroyo teritorial. A identifica diferente oportunidad pa colaboracion den esaki y consecuentemente a haci palabracion pa tene un otro encuentro na Corsou, pa di e forma aki sigui identifica diferente tema di importancia.
Por ultimo, pa loke ta e tema di maneho di desperdicio, Aruba conhuntamente cu Corsou ya caba a tuma e prome paso pa por sera un red di partner den region reforsando e posicion di nos paisnan considera chikito pero sigur ‘potente’ den e region.
