Recientemente Minister Plenipotenciario di Aruba na Washington DC a informa cu studiantenan di Aruba por studia na University of West Florida na un prijs reduci.
Recientemente Minister di Educacion di Aruba a firma un Memorandum of Understanding cu University of West Florida, cu ta situa na Pensacola, Florida. E acuerdo di colaboracion ta encera cu UWF pa aña escolar 2020-2021 ta ofrece na un total di cinco studiante di Aruba e oportunidad pa por studia na UWF na e prijs special cu un residente di Florida ta paga. Loke nos ta yama “instate-tuition fee”. UWF ta dispuesto pa evalua pa proximo aña subi e cantidad di studiantenan cu lo por bin na remarca pa e prijs special aki, depende di e exito di e acuerdo. E prijs special aki ta un suma costo di educacion di USD 5500,00 pa aña. Alabes UWF ta exigi pa tur studiante den nan prome aña biba den e cambernan riba nan campus y nan mester tin un seguro. E gastonan pa esaki ta mas o menos USD 9500 pa aña. Esaki ta yega na un suma total di USD 15.000 pa aña cu ta menos cu e suma cu un studiante por haya pa bay studia na Merca conforme e reglanan di Arubalening.
UWF no tin ningun studiante di Aruba ainda y nan lo kier haya un par di hoben di Aruba na nan Universidad. Pensacola ta keda na e punta Oeste di Florida. UWF ta conta cu mas o menos 13.000 studiante y nan ta conoci pa tin klasnan chikito y personalisa. Recientemente Joselin a combersa cu Rachel Hendrix, Directora di e Departamento Internacional na UWF, ken a indica cu te awor ta un hoben so a aplica y nan ta spera di haya mas studiante di Aruba.
Ta importante pa sa, cu UWF no ta e unico scol na Merca cu Aruba tin un acuerdo di colaboracion cu nan pa prijsnan reduci. Aruba tin un acuerdo di colaboracion desde aña pasa cu Wayne State College na Nebraska na unda actualmente tin un hoben Arubiano studiando, University of South Carolina y Coastal Carolina University na South Carolina cu tin varios Arubiano studiando pa e ultimo añanan. Tambe Aruba tin algun acuerdo di colaboracion cu algun Universidad na Canada manera Brescia University, Seneca College, Niagara College, Bishop’s University, Centennial College y Carleton University cu tambe tin varios Arubiano studiando na nan Universidad.
Pa aplica pa e Universidadnan aki mester bay riba nan website y aplica normal. Pa e Universidadnan na Florida alabes mester bay riba nan website di Latin American and Caribbean Scholarship y mester aplica eynan tambe pa haya e tarifa reduci aki. Joselin ta comprometi pa sigui crea oportunidadnan di colaboracion no solamente pa “instate tuition fees” pero tambe pa por haya mas programanan di educacion Mericano pa EPI, EPB, Universidad di Aruba y otro scolnan cu ta acerc’e pa esaki. Asina e ta spera cu pronto EPI lo cera un acuerdo cu Roxburry Community College y Montgomery College.
