Manera Bon Dia a publica recientemente, nos ruman isla Corsou a caba di ricibi un medida di Reino debi na problemanan cu presupuesto. Prome minister Evelyn Wever-Croes a expresa sosten pa Corsou riba su pagina di Facebook.

Diabierna, Corsou a ricibi un medida (aanwijzing) di Reino, indicando cu mester baha gasto pa elimina, of sikiera minimisa, deficit den presupuesto. Riba su pagina di Facebook, Wever-Croes a comenta: “Corsou a ricibi un medida durante e Conseho di Minister di Reino. Den Haag mester realisa cu e manera di traha aki no ta trece solucion.”

Sinembargo, por bisa cu Hulanda ta comparti opinion di Wever-Croes, ya cu Secretario di Estado, Raymond Knops, a comenta riba diabierna cu e instruccion riba su mes ‘no ta yuda’ Corsou, pero cu e supervision financiero mester tuma luga.

Ademas, riba un video publica riba TeleAruba, Wever-Croes ta comenta cu algun persona a conclui cu Aruba ta e proximo pa ricibi un medida asina, algo cu e ta desmenti. “Mi por enfatisa cu desde cu mi tabata den Rijksministeraad siman pasa, e intencion semper tabata pa trece trankilidad, pa trece confiansa, y na niun momento a papia di un aanwijzing of un KB pa Aruba.” Segun Wever-Croes, Aruba na e momento aki ta cumpliendo cu normanan financiero cu a acorda cu Hulanda, pues no tin espacio pa KB ni aanwijzing.

Wever-Croes a termina su mensahe riba Facebook cu palabranan di solidaridad y curashi pa Corsou. “Pa gobierno y comunidad di Corsou, no laga esaki kibra bo. E islanan ta enfrentando retonan enorme, y tin hopi hende cu no ta compronde esaki. Mantene fe y positivismo, como cu esaki lo tene nos bayendo dilanti. Cu Dios bendiciona Aruba y Corsou.”

Wever-Croes a inclui e potret aki, den cual ta mira su persona hunto cu Prome Minister di Corsou, Eugene Ruggenaath, hunto cu su post.

 

 

LEAVE A REPLY

Please enter your comment!
Please enter your name here