Diaranson mainta Minister President y Minister Maduro a reuni cu CAFT riba e situacion financiero di Pais Aruba. A repasa informacion di, entre otro, presupuesto 2021, cuentanan anual 2016, 2017 y 2018, y e condicionnan pa sosten di likides.
Presupuesto 2021
Segun e comunicado di gobierno aki, e crisis di COVID19 ta afecta nos Pais den diferente manera y esaki ta trece cune cu e trabounan pa sera e Presupuesto pa nos Pais pa 2021 ta sufri retraso. Den tempo di crisis ta bira mas dificil pa plania y sigur e crisis sin presedencia di COVID19 aki a pone cu e presupuesto pa 2021 no por a keda entrega promer cu 1 di september. Minister Xiomara Maduro a informa CAFT cu pa comienso di december e Presupuesto di nos Pais lo por yega Parlamento pa su tratamento. E mandatario ta spera cu pa promer cu 15 di december ya CAFT por tin un bista con Presupuesto 2021 lo ta hinca den otro.
Cuentanan Anual 2016, 2017 y 2018
Minister Xiomara Maduro a informa CAFT cu e retraso den entrega di cuentanan anual a keda atendi y Parlamento ta pendiente e debate publico pa trata e Cuentanan Anual di e añanan 2016, 2017 y 2018 den luna di november.
Condicionnan pa sosten di likides
Minister President a splica CAFT unda Aruba ta para den e negosacion cu Hulanda. Falta algun detaye ainda pa keda cla, pero ta hopi serca di finalisa e negosacion na bienestar di Aruba.
