Durante un conferencia di prensa ayera tardi Minister di Husticia y Asuntonan Social, Rocco Tjon, a anuncia e inicio di e trabounan di e Operation Command Center situa na ex hulpbestuurskantoor na Savaneta.
E localidad aki, Minister Tjon a splica, a wordo scogi door di un comision cu ta conta cu expertonan de sector priva y publico y cu ta lidera pa Cuerpo Policial di Aruba. Despues di ricibi e consehonan, sobre todo den e parti tecnico, e edificio aki a keda aproba pa haci inversionnan necesario y converti’e den e Opertacion Command Center.
E diferente fasenan di e proyecto di camara ta bay wordo centralisa na e localidad aki y un ekipo multidisciplinario ta percura pa analisa tur e imagennan y comparti esaki nan cu e diferente departamentonan cu tin mester di esaki pa eherce nan tarea.
Pa loke ta e inversion, Minister Tjon a indica cu esaki ta bay bira un inversion di alrededor di 700 mil florin. El e sigui splica cu full e edificio ta bay wordo renoba por completo pa cumpli cu e exigencianan no solamente pa e operadornan, cu ta bay traha den e centro aki, pero hopi importante tambe pa e por cumpli cu tur aspecto di seguridad.
E inversion aki lo encera tur e tecnologia, screen y software necesario, mueble nobo y un aspecto importante cu e ta inclui tambe ta e parti di mantencion.
“Pa e cinco añanan nos dilanti, tur e parti cu ta toca mantencion, tambe ta cubri den cuadro di e proyecto. Nos por papia tambe di un proyecto duradero y pa nos evita reto- y problemanan cu nos a wordo confronta cune den pasado,” Minister Tjon a remarca.
Por ultimo, el a indica cu e siguiente fase di e proyecto di camara den preparacion caba, cual ta centro di Oranjestad y cu dentro di poco tambe lo wordo realisa. El agrega cu fin di luna, hunto cu Setar NV, lo anuncia e siguiente proyecto, cu ta e proyecto di ‘bodycamaras’ (camara na curpa).
