Den un conferencia di prensa diaranson dia 5 di october e director di Aruparking N.V. a informa comunidad riba e maneho nobo di Aruparking. Sr. Mohamed a splica cu control riba parkeo lo cuminsa atrobe. Esaki lo sosode den fase, cuminsando cu un proceso di conscientisacion. Den e prome fase aki ta cuminsa cu repartimento di stickers pa asina tur usuario por ta bon informa y consciente, pa asina tur hende tin oportunidad pa cumpli cu e reglanan di parkeo.
E fase di conscientisacion lo tin un duracion di tres luna prome cu reactiva control di Aruparking back unda cu si acaso a para ilegal, lo wordo sanciona. Pa awo Aruparking lo ta controlando ciudadanonan cu ta cometiendo infraccion door di plak un sticker oranje como metodo di comunica e infraccion.
Aruparking lo controla entre otro e permiso di tur esnan cu ta parkeer den vak geel. Tambe lo controla si ta para malo, por ehempel estacionando auto riba acera. Parkeervak blanco ta destina pa esnan cu ta paga na un di e parkeermeters. Aruparking ta trahando riba mantenemento di e parkeermeters pa asina tur por wordo activa back na comienso di 2023.
Pa loke ta trata sancion riba esnan cu ta kibra regla, riba esaki lo wordo dicidi proximamente. A palabra cu e Raad van Commissarissen di e empresa lo presenta nan conseho cerca Minister Ursell Arends como Minister di Transporte. Na su turno, minister lo atende esaki denConseho di Minister y eynan lo delibera pa yega na e posicion di Gobierno. Di e forma aki ta yega na e miho solucion pa maneha parkeo den centro di ciudad y pa reactiva Aruparking den su totalidad pa 2023.
“Tin un demanda den comunidad pa un maneho di parkeo den centro di ciudad. Nos mester duna nos hendenan tempo pa custumbra cu Aruparking ta activo atrobe y p’esey lo cuminsa cu un sticker actie. Asina nos hendenan lo wordo conscientisa unda y con mag para. P’esey pa awo ainda no tin sancion. E decision con lo haci esaki aki lo wordo tuma mas despues y segun nos plannan,” Minister Arends ta enfatisa.
