Durante un conferencia di prensa di ayera den oranan di mainta Soroptimist International Club Aruba a duna di conoce cu nan club ta bay wordo inaugura diasabra awor den un evento unda personanan por asisti cu un contribucion pa conoce mas di e club aki.
Noria Eleonora presidente di e club a informa cu diasabra awor e evento aki ta bay bira un “realidad indispensabel den e bida di hende muhe na mundo”, esaki ta trata di un red social di hende muhenan profesional y negociantenan unda cu su eventonan oficial pa cuminsa na Aruba lo tuma luga for di awe 6 di october te diasabra 8 di october.
Pa esaki, a wordo invita diferente miembro di varios pais como di Corsou, Surinam, Poland, Sweden, Hulanda y Alemania unda cu Leonora a señala cu e club internacional aki di hende muhe ta pa mehora y sostene hende muhe y mucha muhe na mundo.
“Awe nos tin tur nos rumannan cerca nos pa bin yuda nos y sostene nos den e club internacional aki, e ta wordo organisa pa cinco federacion, un di Africa, Pacific, Europa, Merca y un di Inglatera y Irlanda, nos ta cay bou union uni di Hulanda unda tin 101 club y cu Aruba ta bay bira e 102 club”, el a bisa.
Tocante eventonan cu ta cuminsa awe, Eleonora a señala cu lo tin e ‘Happy Hour-Welcome’ for di 5.30 di atardi na Hilton Hotel Aruba, “Meet The President Dinner” cu e asistencia di e ex-presidente di e club aki di Europa sra Anna Wszelaszynska y diasabra 8 di october e inauguracion cu ta cuminsa 10or di mainta na Renaissance Convention Center, unda cu entrada tin un costo di 50$ pa esunnan cu ta interesa di asisti na e evento aki por manda un Whatsapp na e number 661.2391.
“Nos di Aruba ta mira e poder pa uni cu tur e otro service clubnan aki na Aruba pa asina nos cuminsa conhuntamente traha hunto cu otro pa hende muhe na mundo y naturalmente nos hende muhenan y mucha muhe na Aruba”, el a menciona.
Igualmente el a bisa cu nan ta bay haya apoyo internacional den nan proyectonan, un di nan ta trata di hoben mediconan cu ta trahando na hospital y cu a wordo constata cu hende muhenan cu no tin documentonan legal na Aruba cu ta na estado por ehemplo, nan tin miedo di wordo deporta y e ora ey nan no ta bay na control regular cu nan tin mester den tempo di embaraso, di esaki ta resulta cu hopi di nan ora nan ta yega hospital e baby ta nace morto.
“Nos a wordo acerca door di nan y esey ta bay ta e prome proyecto cu nos ta bay cera akinan na Aruba, nos ta espera cu hunto cu e otro service clubnan como Fundacion Contra Violencia Relacional cu nan proyecto Orange the World nos ta trahando riba e conscientisacion di nos pueblo, cu e violencia mester stop”, el a indica.
Esaki ta un movemento global di boluntarionan cu ta traha hunto pa transforma e bida di hende muhe y mucha muhe rond di mundo, e red aki tin cerca di 72.000 miembro di 121 pais cu ta traha na nivel local y internacional pa empodera y habilita oportunidadnan pa mucha muhe y hende muhe.
Nan vision ta pa hende muhe y mucha muhe logra alcansa nan potencial individual y colectivo, pa nan realisa nan aspiracionnan y tin e mesun voz den creacion di comunidadnan fuerte y pacifico na henter mundo.
Nan mision ta pa transforma e bida y estado di hende muhe y muchanan muhe a traves di educacion, empoderamento y oportunidadnan di habilitacion.
Nan principio ta cu nan ta pone esfuerso pa e avance di e condicion di hende muhe cu standard di etica halto, derechonan humano pa tur, igualdad, desaroyo y paz, avance di comprension, e bon boluntad y paz internacional.
Algun di nan miembronan ta mentor unda nan ta crea liderazgo den na clubnan y manera Anna Wszelaszynska ex-presidente di Europa a señala den conferencia di prensa aki “nos ta espera cu e club por haci tur esaki como un organisacion no gubernamental y di servicio unda nos tin un stoel na Nacionnan Uni y tambe nos ta miembro di EcoSoc (United Nations Economic and Social Council)”.
Di mesun manera el a invita na e comunidad di Aruba cu si kier forma parti di e organisacion pa subi riba e website www.soroptimisteurope.org unda ta bay haya loke nan ta haci, nan actividadnan y nan rapportnan anual.
Vanessa Hollander miembro di Soroptimist International Club Aruba a haci un invitacion pa diasabra awor pa haya sa mas informacion tocante e apertura di Aruba su Soroptimist Club y tambe lo haya chens di sinta y papia cu nan na e momento ey.
