Dialuna atardi a tuma luga e presentacion di e programa di gobernacion. Durante e rueda di prensa, cada minister a presenta nan vision pa loke ta trata e maneho di nan ministerionan pa e siguiente cuater aña.
Vice Prome Minister y Minister di Transporte, Integridad, Naturalesa y Asunto di Adulto Mayor, Sr. Ursell Arends, a elabora ampliamente ariba ta kico ta e metanan cu e kier logra cu cada un di su ministerionan.
Minister Arends a indica primariamente cu e enfoke general pa su ministerionan ta pa amplia e tareanan di tur e departamentonan, modernisa tur e ley- y reglanan cu ta cay bao di e ministerionan en general, traha hunto cu e departamentonan pa asina modernisa y canalisa esakinan tambe.
“Transporte ta conecta personanan como tambe oportunidadnan”, e minister a bisa. El a splica ya caba, pa loke ta trata transporte di nabegacion, aviacion, y tambe transporte publico, tin diferente oportunidadnan cu a keda identifica y riba e oportunidadnan aki nan lo bay amplia y traha conhuntamente cu e partnernan strategico, tanto local como internacional, pa desaroya esakinan tambe. El a menciona cu esaki mester bay man den man cu e naturalesa tambe, bienestar general pero tambe cu naturalesa en general. “Nos no por bay desaroya esakinan sin tene debido cuenta cu loke ta trata naturalesa”.
Pa loke ta trata e pilarnan y sectornan economico, Arends a señala cu den transporte tin varios di nan cu a keda identifica y su ministerio lo intensifica e atencion debido na esaki hunto cu e ministerio di economia pa asina nan por desaroya esakinan tambe pa haci Aruba financieramente stabiel.
Pa loke ta trata integridad, “integridad ta e esencia di exito real cu ta determina e caracter general di henter un nacion y esey ta loke nos ta bay haci”, Arends a bisa. El a indica cu ya caba e fundeshi a wordo traha loke ta trata integridad y den e proximo cuater añanan el lo elabora ariba esaki y sigui desaroya e fundeshi aki. Integridad lo ta encarga pa implementa e reglanan pa tur hende, tanto den aparato publico, pa nan mes como gobernante y tambe pa loke trata sector priva, haciendo esaki lo mas duidelijk posibel.
“Nos ta bay introduci e reglanan di integridad pa asina tur hende sa na kico nan mester tene nan mes debidamente. Nos lo traha hunto cu e comision di Corporate Governance pa asina introduci e landsverordeningnan necesario y Corporate Governance lo ta algo cu henter e aparato publico lo por tene su mes na dje tambe”, el a agrega.
El a enfatisa tambe cu e Ministerio di Integridad lo brinda e hermentnan necesario pa asina via Bureau Integirteit Aruba por sigui educa y elabora ariba kico kiermen integridad y esaki lo ta enfoca ariba promocion di comunicacion riba integridad, no solamente den e aparato publico pero pa henter e comunidad.
Naturalesa ta un di e partinan mas importante y cu tambe ta sufrie hopi pa motibo di entre otro desperdicio y mas cu claro e dump di Parkietenbos. Pa e maneho di locual ta trata naturalesa el a splica cu, segun e ta kere, pa prome biaha tin un Ministerio di Naturalesa organisa den e forma cu e Minister a organisa esaki y e meta principal di e forma di organisacion nobo aki ta, no lo ta solamente pa tuma tempo pa proteha naturalesa, pero nan ta pasa over na proactivamente promove naturalesa y asina traha pa e desaroyo y bienestar di dje.
“Mi ta kere cu esaki, manera nos a organis’e, y manera Minister President a bisa nos ta bay tackle e RWZI, nos ta bay tackle Parkietenbos, dus trece solucionnan duradero pa loke ta trata e maneho di desperdicio tanto likido y tambe pa loke ta trata e desperdicio solido. Esakinan ta caminda nos lo trese solucionnan mirando cu esakinan tambe ta afecta e unico pilar economico di Aruba na e momentonan aki, cual ta turismo. Esey ta loke e programa ta elabora ariba dje, con nos ta bay atende y proteha naturalesa y finalmente yega tambe na duna naturalesa e derecho cu e ta merece”, el a agrega.
Finalmente pa loke ta trata Asunto di Adulto Mayor, el a splica cu lo bay tin un departamento pa asunto di adulto mayor cu ta bay centralisa tur loke ta cay bao di adultonan mayor y di e forma aki nan lo bay brinda espacio y dedica tempo na guia, informacion, prevencion di malesa y negligencia cu a bin ta tuma luga den e ultimo temponan y esey no por wordo ignora mas. El a indica cu na esaki nan lo bay duna contenido pa e proximo cuater añanan pa asina duna e balor real na cada persona cu ta riba 60 aña di edad den comunidad pa nan tambe por sinti cu e gobierno aki ta traha debidamente na nan fabor y garantisa nan un bon calidad di bida.
“Un pais orguyoso di su raiz ta balora y cuida su fundeshi pa garantisa su futuro. Nos adultonan mayor a traha fuerte, traha duro pa nos tin e Aruba cu nos a hereda awe”, Arends a expresa.
