Durante su conferencia di prensa di dialuna 18 di october Minister di Transporte, Integridad, Naturalesa y Asuntonan di Adulto Mayor, Sr. Ursell Arends, a responde pregunta ariba maneho di integridad di su parti como e minister di integridad y con el lo dirigi su oficina y tambe ariba e Wever-Croes norm.

El a enfatisa cu pueblo di Aruba por ta consciente y pueblo por ta sigur cu nos lo atende cu tur e regala nan di integridad. Na varios ocasion Minister Arends a splica cu e prome stapnan cu el lo tuma ta bay ta pa sigura un codigo di conducta pa e ministernan y el a indica cu ya caba el la tuma nota cu e Parlamento di Aruba a cuminsa implementa esaki tambe pa loke ta trata parlamento mes, cual ta e organo mas halto di pais Aruba.

Nos di parti di gobierno nos lo sa di haci nos tarea pa entrega un integriteits beleidsplan pa full e aparato publico, implementa e codigo di conducta pa nos como minister y despues nos ta implemente pa e aparato publico tambe”, el a bisa. E ta indica tambe cu e tarea di integridad no ta un trabou cu mester cay bao di gobierno solamente, “sector priva tambe mester reconoce nan tarea pa implementa reglanan di integridad pa e sector priva y den e caso aki nos tambe lo yuda pa fungi como e ehempel pa mustra cu di parti di gobierno nos ta ataca esaki y nos kier stimula nos comunidad, stimula sector priva pa tambe ataca esaki den nan manera.

Pa locual ta trata e Wever-Croes norm (Landsverordening normering top inkomens), cu ta un ley cu ta pone un maximo na e salario di un director di un compania estatal na 130% di e salario di un Minister President, Minister Arends a indica cu esaki ta aglo cu ta wordo carga door di henter Gabinete Wever-Croes II.

Mi ta kere esaki ta algo cu ya caba Minister President a discuti na varios ocasion y nos ta spera cu pronto nos por haya e cooperacion di tur e departamentonan tambe, e directive-, bureau- y dienstnan pa nan tambe por yuda nos carga esaki den e aparato publico riba un sentido Amplio”, el a agrega.

LEAVE A REPLY

Please enter your comment!
Please enter your name here