Diaranson anochi, Minister Xiomara Ruiz-Maduro tabata presente na apertura di Immerse Innovation Week na Futura Cafe den Caya Betico Croes.
Un proyecto inovativo cu Futura a hinca hopi bon den otro, na unda ta figura Supernova, cu ta un espacio pa nos hobennan mucha muhe siña mas di e materianan di Ciencia, Ingenieria, Tecnologia y Matematica. Tambe Spaces, den cual nos por admira diferente expresion artistico di solucion pa cambio climatico, igualdad di genero, inclusion financiero y turismo sostenibel.
E pop-up Futura Cafe mes lo ta habri full e siman aki pa asina comunidad por topa otro y comparti pensamento y solucion cu otro. Como parti di e siman di innovacion lo tin e conferencia ATECH, cu lo cubri e tema futuro di tecnologia, startups y ecosistema, trabou, arte y cultura.
“Masha pabien na Minister Presidente Evelyn Wever-Croes y full e team di Futura, bou liderasgo di Sra. Varelie Croes pa e bunita trabou inovativo aki pa Aruba.”
