Ayera atardi, minister y lider di partido FUTURO Gerlien Croes a presenta na oficina di Gobernador pa tene un di e reunionnan cu ta tuma luga regularmente cu lidernan di partido y/of fraccionnan. Sinembargo, e reunion aki ta uno cu a carga importancia particular pa motibo cu tin tension entre e partnernan den coalicion AVP y FUTURO.

E tension aki ta bini pa motibo cu ta aparenta di tin un diferencia den opinion entre e dos partido tocante e implementacion di e aumento di salario minimo, cual ta inclui den e programa di gobernacion. Segun ta compronde, partido AVP ta para firme riba esaki y for di basta tempo caba tin diferente declaracion di ambos banda, unda ex-lider di partido AVP Mike Eman a papia tocante e topico aki y a indica cu a yega momento pa aumenta salario minimo na por lo menos bestaansminimum,

Segun informacion cu ta andando rond, tin varios menasa y insinuacion di parti di partido AVP cu ta bisa cu lo subi salario minimo, cual pa yega bestaansminimum lo rekeri un aumento di por lo menos 500 florin, si of si. Sinembargo, partido FUTURO te ainda no ta cla pa acepta un aumento asina drastico.

Despues di sali for di e reunion cu Gobernador, minister Croes a tuma un momento y a papia cu prensa, splicando cu “durante e formacion di e gabinete aki, nos tabatin varios prioridad poni riba mesa y un di nan sigur pa Aruba ta mehora e poder di compra.”

Segun minister Gerlien, “e realidad cu nos ta biba cu ne na nos pais ta cu Aruba ta un isla cu a bira sumamente caro y nos a identifica esey no di awo caba y nos a bisa cu nos lo haci hopi intento na busca manera cu por mitiga e impacto cu ta bin hopi biaha for di exterior. Nos tin cu realisa cu nos ta un isla cu ta importa tur cos, prijs subi afo, ora prijs di container subi, tur cos ta sigui bay den un efecto y na final di dia pueblo ta paga p’e y nos como gobierno mester sa di tuma decision cu por mitiga e impacto pa tur hende na Aruba.”

Pa mitiga e impacto aki tin diferente manera, entre otro “introduci reformanan fiscal, cual ta un topico cu nos a acorda den e acuerdo di gobernacion”, y tocante esaki e minister ta comparti cu te hasta tin un rapport cu a haci na Amsterdam, y “den e rapport aki bo ta wak cu nan ta propone varios manera pa mitiga e gastonan di bida diario di nos ciudadanonan. Nan ta papia di introduccion di un huur toeslag, introduccion di kinderopvang toeslag, introduccion di energietoeslag, di aumento di pensioen, aumento di salario minimo, nan ta papia di diferente forma cu por mitiga e peso aki.”

Tocante e trabao cu ta bin andando tocante e aumento di salario minimo, e minister a splica cu “aña pasa, nos a duna tur e confiansa na Prome Minister pa cuminsa un trayecto di dialogo social y nos mes a dun’e sosten den e proceso … y nos a compronde na caminda cu tabatin poco situacion cu no a facilmente yega na acuerdo cu gremio, Prome Minister tin su banda di medaya, gremionan tin nan banda di medaya, esaki no ta haci diferencia aworaki. E hecho ta cu prome minister a informa cu tin e deseo di traha riba aumento di sueldo minimo na Aruba y nos a haci pregunta di con leu nos ta cu dialogo cu gremionan. Pakico e ta importante? Pa motibo cu na momento cu bo introduci aumento di salario minimo, si bo no sinta cu e gremionan na mesa, algun di nan por carg’e facilmente … pero bo tin hopi small, medium enterprises y bo tin otronan cu ta bisa bo ‘wak, si bo ta bay hisa mi gasto, mi tin mas gasto fin di luna y mi no ta haya ningun manera di baha mi gasto por medio di cambio fiscal, mi ta hink’e den mi prijs.’ Dus gobierno ta dicidi y mi ta hink’e den mi prijs y tur cos ta bira mas caro.”

E declaracion di e lider di partido ta cu e punto di salida pa FUTURO ta cu no ta den contra di e aumento, sinembargo “Aruba no mag di bira mas caro, Aruba no mag di bira mas costoso, Aruba no mag di bira impagabel, e ta caro caba.”

Segun por a compronde, partido FUTURO a expresa su deseo pa sinta y logra yega na un acuerdo cu gremionan, y ta di opinion cu no ta costa nada pa bolbe haci e intento, principalmente mirando cu e gremionan ta sumamente importante pa yuda cu e decisionnan aki. “Cu e punto di salida cu e ta un bunita momento pa papia cu gremionan riba otro topiconan tambe kisas alabes, ban haci e sueldo minimo, pero ban papia di biaha di otro cambio fiscal cu por yuda gremionan tambe cu ta mitiga e peso. Paso bo kier yuda e grupo aki, y bo kier yuda tur otro grupo, bo no kier pa ningun hende den ningun forma keda perhudica. Ban sinta na mesa cu gremionan back,” Minister Croes a declara.

Na juli ultimo a tuma decision di inicia un trayecto pa gana tempo cu e concepto di e ley, y alabes lo sinta cu gremionan pa asina na momento cu yega na otro, tur cos en principio lo ta cla. “Mi tin cu bisa e ley te awe ainda no ta completo, dus nos a haci e peticion y mi ta kere cu nos ta hopi redelijk pa haci un peticion pa nos sinta un rato na mesa. E rapport di SER cu ta na mesa tambe ta bisa cu tin necesidad pa haci e cambio aki pero alabes e cambio no aki no por bay sin flankerend beleid.”

Tambe a informa cu dia 6 di october a oficialmente pidi e minister di Economia pa tuma over e dialogo cu gremio y minister Croes a trece dilanti cu e decisionnan aki ta regarda datos. “Nos tabata en espera di locual ta presentacion cu nos a haya dos siman pasa riba cua e impacto financiero ta, kico e kiermen pa pais Aruba. Tabatin pregunta cu a haci, mientrastanto colega Wever a caba di ricibi un rapport tocante analisis macroconomico. Shonnan anos unico cos cu nos ta pidiendo manera tur gobierno ta funciona, ta un rato di miho preparacion … mi ta kere den gobierno nos mester por traha cu otro a base di comprension y a base di informacionnan y decisionnan responsabel pa futuro generacionnan di pais Aruba. Nos kier haci cambio cu ta bay beneficia tur hende na final di dia.”

Sinembargo, continuamente tin declaracionnan cu ta bisa cu no tin espacio “pa ningun rato di dialogo” y “esey pa nos ta hopi straño. Si bo ta un gobierno cu ta basa bo mes riba decisionnan cu bo ta bisa cu tur decision cu bo kier tuma mester ta a base di dialogo social, esey ta den nos acuerdo di gobernacion den top 3, Mi no ta kere cu mester por tin un problema pa duna e espacio pa nos por traha na sinta back cu gremionan.”

Diabierna ultimo, gremionan a manda un carta cu firma di tur gremio unda nan a detaya cu e situacion no ta cu nan no kier traha cu gobierno, sino cu nan kier mas dialogo cu gobierno. “Pa nos ta cuestion di sa for di nos partner di coalicion cu bo ta duna nos e espacio aki, of nos ta duna nos mes como gobierno e espacio aki, pa sinta back na mesa y tuma un decision responsabel pa futuro di e pais. Pasobra indicacion cu nos ta haya den declaracion publico ta cu no tin espacio mas pa papia y cu e ley mester cana su caminda sin e otro paketenan pa mitiga e consecuencianan financiero cu esaki por tin.”

Loke partido FUTURO ta pidi ta claridad. “Pa nos e situacion aki tin varios siman ta desaroya y nos ta pidi claridad. Nos ta ripara ta cu tin un presion di tempo y mi ta kere cu e tin di haber cu e decision cu prome minister a tuma … cu pa nos tambe no tabata algo cu nos a pensa ta bay sucede, nos a conta di forma gobierno cu e prome minister ta keda tambe pa 4 aña. El a dicidi diferente cu ta ok, nos tin comprension. Pero nos ta sinti cu kisas door di esey tin un presion di tempo y mi ta kere den ningun gobierno presion di tempo, osea si no ta situacion urgente, presion di tempo mester pone nos tuma un decision cu no ta completamente forma manera nos kier pa e ta.”