Ministerio Publico: Paul Croes ta keto bay un sospechoso

Desde dos luna atras Aruba a keda den un shock cu e investigacion grandi cu awor ta carga e nomber IBIS unda ta sospecha entre otro minister Paul Croes di corupcion na un forma pasivo y/of activo. Durante tempo tin varios detencion cu a tuma luga di tanto ambtenaarnan como hendenan cu ta traha manera tramitado.

Tumando na cuenta cu a pasa algun tempo y tambe declaracionnan haci na algun medio di comunicacion pa abogado Marije Vaders kende ta representa e mandatario, Bon Dia Aruba a acerca e vocero di Ministerio Publico, Sra. Ann Angela pa asina haya sa kico e status ta.

Omkoping
Den e ultimo detencion cu a tuma luga caminda a detene tres persona a wordo declara un biaha mas cu esaki ta relaciona cu omkoping. A puntra vocero di Ministerio Publico kende exactamente ta e persona(nan) cu ta wordo sospecha di a tuma e soborno y a haya manera contesta cu ta trata di e minister (Paul Coes) y tambe ambtenaarnan cu a wordo marca den e investigacion manera su complicenan.

E pregunta cu hopi hende ta puntra nan mes ta si e minister ta sospechoso e ora pakico no a arest’e ainda? Segun Angela ta splica, “Cada caso tin su mes strategia y tempo. Un caso di e amplio y complica aki tambe ta cana manera e mester cana.” E vocero ta sigui comenta cu e exito di cualkier caso no ta depende unicamente di detencionan.

Declaracion abogado defensor
E abogado cu ta defende e minister a bisa den un entrevista cu NoticiaCla cu e no a ricibi ningun documento for di ministerio publico riba e caso di su cliente. Vaders no ta comprende pakico ministerio publico ta dal asina hopi buelta y si berdad tin algo di prueba riba e minister. A puntra Sra. Angela basa riba e declaracionnan di Vaders kico ta e motibo cu no a duna niun documento ainda pa cual e a bisa “Nos no ta reacciona riba abogado di un sospechoso via prensa.”

Rumornan circulando
Den e ultimo dos simannan aki nos redaccion a ricibi varios comentario riba e caso aki. E locual cu a capta nos atencion cu tin mas di un persona, kende ta hopi cerca involucra den e asunto aki ta menciona cu e “move” aki ta uno politico y cu ta un man drechi di e minister mes a sacrific’e. Te na momento aki nos no tin ningun confirmacion si esaki ta veridico pero un di e personan ta bisa un reportero di Bon Dia: “No ta straño cu a haci huiszoeking tur caminda menos na su cas mientras cu e tabata esun mas cerca di e minister?”

Bon Dia Aruba ta buscando mas informacion riba e rumornan aki y lo sigui informa bo.

You May Also Like

New India Assurance y STA a firma CAO pa 3 aña

Ayera gerencia di New India Assurance a firma un contracto colectivo (CAO) nobo cu sindicato ...

Resultadonan campeonato nacional atletismo

  Riba 23 y 24 di juni a tuma luga e campeonato nacional di ...

COA: Plan di maneho y presupuesto 2017 aproba

Comite Olimpico Arubano a tene nan di 2 Asamblea General di e aña aki, ...

resumen januari.jpg

Resumen di noticianan local 2015 luna di januari

Akinan por mira algun di e noticianan cu mas a resalta durante di luna ...

Arthur dowers

Esunnan culpabel di locual cu a sosode na KIA por wordo castiga cu maximo 15 aña

Recientemente detenidonan den KIA a cende candela den diferente parti di e bloknan di cel, unda ...

piedra plat caso .jpg

Dama Chines ta bisa a hinca Fingal mata pa defende su mes

Despues cu polis a caba cu e integoracion di e dama Chines den e ...