Ministro Lampe ta reacciona riba Colegio San Nicolas: ‘No por para e proceso di nombramento di management team’

Bon Dia Aruba a ricibi di minsitro encarga cu Enseñansa su reaccion riba e recado di prensa di e docentenan di Colegio San Nicolas, di cual e medio aki a informa diasabra pasa. Den e recado e docentenan ta boga pa anula henter e decreto, pa dialoga “from scratch”. E ministro sin embargo tin otro cosideracion.

E mandatario den su contesta manda pa Bon Dia Aruba ta resumi su punto di vista den cuatro punto:

1. E mandatario ta para pa un dialogo transparente. E docentenan a indica cu nan no tin problema cu e conseho di Directie Onderwijs pa pensa den direccion di un educacion bilingue, Hulandes y Ingles, pero cu nan tin problema cu e palabra “fusie”. A honra e deseo aki. Un dialogo sincero ta nifica cu no por tin decision tuma caba y pesey no ta na su lugar e palabra fusie den e MB, segun e ministro.

2. E rector actual mes a indica na ministro hopi luna atras cu e ta bay baha cu pension y cu e tin hopi dia di vakantie aden, y pesey a yega na e palabracion cu den juli e traspaso lo tuma lugar y cu e lo tuma su vakantie den augustus y september y per 1 october e ta bay goza di su pension. Como bevoegd gezag di Colegio San NIcolas ministro tin cu percura pa e scol no cay den un bashi di liderazgo. Mirando COVID y e tempo cu ta cortico, a dicidi pa start un proceso reduci di solicitacion rapido pa un interim managementteam cu lo keda pa un aña, y durante e un aña aki nan tarea ta pa percura pa un proceso di solicitud habri yega na un rector y conrectornan nobo. A cera e proceso cu 14 hende cu a solicita pa e interim managementteam, di cual varios di e cuerpo di docente di Colegio San NIcolas mes. No por draai back e proceso aki, e rector saliente no por pidi awor pa keda si ta e mes a indica na inicio cu e ta bay cu pension y ta pesey a cuminza haci e preparacionnan pa ora e bay cu pension. Mester bin un MB nobo pa reemplaza e anterior cu ta e base di e autoridad cu e comision instala ta haya pa evalua esnan cu a solicita.

3. No por interrumpi e proceso aki awor cu falta un par di dia pa juli cuminza unda e traspaso mester inicia. Esey no ta responsable pa cu e alumnonan cu mester start na augustus back na scol.

4. Ta precisamente e tarea di e interim managementteam pa durante un aña duna tur input posible na e cuerpo di docente pa loke ta e contenido di enseñansa bilingue, si scoge pa e rumbo aki.