MinPres a pidi pa no tin discrepancia of polarisacion: No mester di organo independiente pa supervisa aporte di solidaridad

Gobierno a presenta proposicion pa cortamento di salario den aparato gubernamental. Minister Presidente Evelyn Wever-Croes a informa cu nan a sostene un reunion cu e gremio sindical riba cortamento den salario di empleadonan publico.

E cortamento aki tambe ta inclui riba salario di ministernan y parlamentarionan pa nan aporta na e fondo di solidaridad. Esaki tambe ta inclui conseheronan di minister, directornan di compania estatal, etc…

Cero discrepancia.
Sinembargo e proposicion riba cortamento di salario y beneficio den aparato gubernamental a crea un discrepancia cu sector priva. Ya cu mientras cu ambtenaar ta keda entre otro cu vakantiegeld najaar, voorjaar, etc., den empresanan priva nan a wordo elimina pa mantene hendenan den trabao of nan no ta existi mes. Premier Wever-Croes a haci un apelacion na henter comunidad y tambe pa e trahadonan, tanto di e sector publico como sector priva. E ta haya cu mirando e situacion cu pais Aruba ta pasando aden debi na e crisis di Covid-19, esaki no ta momento pa busca discrepancia den un banda of otro. Of crea polarisacion.

Segun e prome mandatario, nan ta haciendo lo posibel pa haci un apelacion riba empleado publico pa nan tambe entrega y mustra solidarismo. El a trece dilanti cu tempo cu Aruba tabata den problema financiero ta empleado publico a entrega y no sector priva. “Aworaki sector priva ta den problema y nos ta pidi empleado publico pa nan tambe entrega,” el a contesta riba un pregunta formula pa Bon Dia Aruba.

Igualmente el a bisa cu gobierno ta buscando e fondonan pa atende cu e crisis aki. E mandatario ta haya cu si e ambtenaar ta entrega 5%, 6% of 7%, esey no ta saca nos di e crisis aki. Pero e ta haya cu esaki ta mustra si un gesto hopi bunita di parti di empleado publico. “Laga nos aprecia e gesto aki y tur e trabao cu ta wordo haci, pasobra si no nos ta bay sali afo y tur energia ta bay perdi na busca polarisacion,” el a declara diasabra anochi.

Igualmente te aworaki premier Wever-Croes no ta haya e necesidad pa gobierno lo institui un organo independiente pa controla y supervisa e recurso aki cu ta bin di e cortamento riba salarionan lo wordo uza. “Na e momentonan aki nos no tin plan pa bin cu nada independiente,” el a declara na otro pregunta formula pa e matutino aki.

E mandatario a agrega cu tin pleno confiansa den nos aparato financiero cu e ta haya cu ultimo tempo ta bin realisando un trabao sublime di control. E no ta descarta cu si den futuro tin necesidad pa bin cu un fondo separa of otro mecanismo di control, nan lo evalua esey. Pero e no ta haya oportuno pa e momento aki gobierno ta bay crea un fondo apart y mas gasto; y tambe crea otro polarisacion eynan tambe.

Proposicion.
E proposicion cu gobierno a presenta na e sindicatonan pa corta gasto ta inclui: Salario di minister, parlamentario, conseheronan di gobierno y directornan di empresa, caminda nan ta corta nan salario cu 10%. Pa loke ta empleadonan di gobierno, fundacion subsidia y empresanan estatal ta corta cu 5%.

Tambe ta corta beneficio di vakantie-uitkering, bonus, premies pa empleadonan y pensionadonan di gobierno, fundacionnan y empresanan estatal cu 50%. Gobierno a pidi cu e proposicion di solidaridad ta cuminsa for di luna di mei te luna di december.

Segun gobierno e ta un cortamento total di 12.6% di empleadonan y 15% di minister, parlamentarionan y directornan di companianan. Esaki mester contribui cu 91 miyon florin como un aporte di solidaridad di sector publico na e 37 mil persona cu ta perde trabao debi na e crisis.