MIO ta perde licencia: Proceso di desconexion ta inicia awe

Manera cu Bon Dia Aruba a informa, e compania di telecomunicacion MIO tabata tin te cu 30 di juni pa cumpli cu pagonan atrasa. Minister di Asuntonan Economico Richard Arends ta confirma na nos redaccion cu e compania no a cumpli cu ningun pago pues autorisacion a wordo duna pa revoca e licencia.

Mas o menos 6.000 cliente ta bay keda sin servicio di telefon y internet despues di e fin di siman aki, cual ta e proceso teoreticamente segun e minister. “DTZ lo inicia e proceso pa desconecta desde awe,” Sr. Arends ta confirma na Bon Dia. Pa locual ta e futuro di e clientenan y empleadonan di e compania, e mandatario ta laga sa cu: “Mi a sinta cu DTZ pa nos wak con nos ta haci. Aworaki MIO pa mi ta un ‘done deal’ pero loke ta preocupa mi aworaki ta e empleadonan y clientenan, nan no a wordo informa. Cu esey ta responsabilidad di gobierno mi no ta kere. Pero si pa duna un chens pa switch over pa un otro proveedor.” Con largo e proceso aki di desconexion lo dura no ta conoci mirando cu e ta uno basta tecnico segun e mandatario ta bisa nos. Nos a purba tuma contacto cu DTZ pa un reaccion riba esaki pero no a logra.

MIO su banda
E compania ta nenga di duna comentario na prensa na momentonan aki. Sinembargo ta subraya cu nan ta forsa pa duna declaracion publico na momento cu gobierno dicidi di tuma accion contra nan. Bon Dia Aruba a tuma contacto cu doño di e compania Benjamin Allen kende a duna di conoce cu e ultimo shete aña MIO a haci tur cos den su poder pa ofrece un servicio extraordinario, y na un prijs rasonabel.

E ta comenta:”Manera un compania cu a lanta door di inversion Mericano, nos a sinti nos mes como bishitante na Aruba. Nos a tuma e hospitalidad cu nos a haya door di e pueblo di Aruba den consideracion. Pa e motibo aki, nos a dicidi respectivamente pa no duna comentario na momentonan aki cu tin tension politico, a pesar cu tin declaracionnan publico cu a wordo haci en cuestion cu nos compania. ”

Ley nobo despues di 100 aña
E ley di telecomunicacion cu nos tin ta uno di aña 1917.”E ta un tremendo ley cu a sobrevivi 100 aña cu tur e avancenan tecnologico cu tin.” Cu e ley aki segun e mandatario ta splica nos, lo hala aden e ley di telecomunicacion anto introduci un ley di comunicacion electronico. Esaki ta encera telefon, internet, cable, celular y cu ta pas mas na e era cu nos ta bibando aworaki segun e minister. E ta un ley cu ta bao discusion aworaki y ta trahando riba dje durante e ultimo cinco aña.