Ayera mainta comunidad por a mira den centro di playa, specificamente na caya Weststraat, e presencia di Mobiele Commando Kamer di Cuerpo di Polis di Aruba.
Tocante esaki, vocero di Cuerpo di Polis, Lito Lacle a splica cu ta algo preventivo y cu mando policial a dicidi di pone pa tempo indefini eynan. E ta conta cu sistema sofistica di varios camara y cu un funcionario di Cuerpo di Polis lo ta aden pa por controla e luga y cualkier tipo di situacion cu lo por presenta.
Lacle a señala cu loke Cuerpo di Polis kier ta pa e turistanan y hende local sinti nan mes sigur, esaki relaciona cu diferente incidente cu a sosode recientemente, di ladronicia of atraco rond di e luga en cuestion.
Di mesun manera, Lacle a sigura cu Mobiele Commando Kamer ta visibel pa motibo cu ta un strategia cu a traha mundialmente y lo keda na e luga desde cu e tiendanan ta habri te e ora di nan ciere.
