YMCA Aruba lo tene nan actividad pa vakantie di carnaval na YMCA San Nicolas. E actividad lo tuma luga entre 17 te cu 21 februari pa hoben di 12 pa 16 aña di edad.

Anky Vrolijk president di e board di YMCA Aruba a duna di conoce cu e campamento ta completamente gratis danki na CIBC Internacional y local pa ofrece pa e camping tuma luga un biaha mas.

Esaki lo ta e di tres campamento moderno cu lo tuma luga na YMCA San Nicolas. Pa mas facilidad lo por laga e hoben na YMCA Dakota y lo bay tin ‘vervoer special’ pa hiba e muchanan te YMCA San Nicolas.

E tema di aña aki ta ‘Tech and Fashion’. E ta bay wordo haci pa Christie Mettes di Brenchie’s lab cu ta bay ta encarga completamente cu e contenido y material cu ta bay rond di e mundo moderno di tecnologia combina cu moda y arte.

Vrolijk a splica cu nan a tene na cuenta cu hoben mirando cu ta den dianan di vakantie. Pa e motibo aki a cuminsa for di 10am te cu 2pm. Lo tin inclui cuminda pa mucha y gratis tambe pa colaboracion di YMCA LACA cu ta di Latino America y Caribe cu ‘Aruba ta afilia na dje’.

El a comparti algun detaye di contenido manera shirt di luz, caminda cu si haci cierto movecion luz ta sali of zonido. “Tambe manera armband cu ora hende ta core den madruga of anochi scur, anto e luz por cende. Den e direccion ey nos por pensa.”

Den e mundo di internet ta haya tecnologia y moda mundialmente. Aruba tambe ta aden y pa medio di esaki ta hacie. Mirando tambe cu den e grupo di edad en cuestion no tin actividad pa hoben, YMCA Aruba su fundacion ta enfoca riba e hoben ‘YMCA mundialmente ta e fundacion cu mas hoben cu ta existi na mundo’.

Tin un limitacion pa e muchanan cu ta bay inscribi. Solamente por 24 mucha lo wordo registra. Nan no ta yega un cantidad mas halto pasobra nan kier dedica atencion na cada individual. Nan ta pidi pa mayornan por yama of pidi pa mas informacion pa motibo cu cupo ta limita.

Nan tin experiencia den e otro dos camping, caminda el a yena lihe y nan tabatin lista di espera. Nan ta pidi si pa esunnan cu registra no keda sin bin pasobra ta stroba otro mucha cu si kier a atende.

Pa ora di registra nan ta pidi pa skirbi e nomber y edad di e mucha. Despues di esey nan lo mester sigui un ‘registration form’ caminda mester yena mas informacion manera AZV of otro detaye pa tur cos ta sigur.

Pa mas informacion por yama na YMCA Dakota 5823072 of YMCA San Nicolas 5684503. Por check riba nan Facebook page Ymca aruab, tambe por acerca na nan website www.arubaymca.com Por Email ymakerscamp@gmail.com.