Aruba ta cas di cantidad di parha di e especie conoci como ‘hummingbird’, na Papiamento, blenchi, y un di nos parhanan sin igual a keda conmemora den color riba un moneda nobo di nos Pais, como e unico moneda conmemorativo di 2020.
Segun informacion di coinworld.com, e moneda di cinco florin traha di silver .925 ta mustra e blenchi colorido. E parha special aki haya na Aruba ta asina chikito cu hopi biaha ta confundie cu un abeha of otro insecto prome cu ta identifica esaki como un blenchi, segun e distribuidor di e moneda na Merca, Coin & Currency Institute.
Maske e fecha ta 2020, e moneda a keda lansa dia 28 di april 2021, y ta e unico moneda conmemorativo pa Aruba pa 2020.
E moneda di cinco florin aki ta yega despues di otro moneda conmemorativo cu tema di bida salvahe – e prikichi, soldachi y turtuga – y ta e moneda final den e serie.
E moneda ta pesa 25 gram y ta midi 38 milimeter di diametro. E cantidad autorisa di moneda ta 550 piesa. Cada moneda ta bin den su caha original cu certificado. Esakinan ta ofreci pa e distribuidor, coin-currency.com.
