Ayera nochi a tuma luga Aruba su prome parada di carnaval. A pesar di diferente rumor den comunidad pa un supuesto tip indicando cu Yellow lo a bisa di basha bala riba multitud, e parada a bay trankil. Vocero suplente policial Liliana Rasmijn a bisa cu e cantidad di detencion y cantidad cobra na multa a baha drasticamente compara cu aña pasa.
E parada a sali pa exactamente 8:07 PM y e cabes a yega 12:00 AM. E last lap a yega e final al rededor di 1or y mey, y tur cos a bay bon pa loke ta e prome parada. Motibonan di e detencionnan haci durante di e parada tabata mas tanto pa buracheria publico y no sigui ordo di polis.
Den pasado Parada di Flambeu sa conta cu hopi mas detencion y problema sinembargo por mira cu e cantidad aki a bira considerablemente menos e aña aki. Detaye cu nos tin di aña pasa ta 27 detencion y 15.450 florin cobra na multa.
No ta solamente polis ta opina cu e parada a bay trankil, sinembargo varios participante den diferente grupo tambe e subi medio social pa gaba con dushi nan a pasa den e parad, algun bisando cu ta prome parada cu nan a pasa asina bon, y otronan pidiendo pa e anochi di fakkel ripiti su mes pasobra nan no a haya suficiente.
E luna aki ta yena cu actividad tur fin di siman y algun dia hasta den siman. E fin di siman aki lo tin diasabra dia 9 di januari eleccion di Prins cu Pancho di mucha y hubenil tur tres categoria di edad na Cas di Cultura cu ta cuminsa 6’or y mey atardi. Diadomingo lo tin e Parada di Blaas na San Nicolas cuminsando 2’or di atardi y pa 6or di atardi Calypso y Roadmarch Contest 2016 na Carnival Village San Nicolas.
