Ayera tardi, miembronan di Movemento Dominicano Unidos na Aruba a bay dilanti di Consulado di Republica Dominicana na Aruba pa expresa nan kehonan contra e sede diplomatico aki.

Ramon Valdes, kende ta activista di e movemento aki, a declara cu nan tin un serie di denuncia contra e maneho di e consulado aki. Ademas nan ta un movemento cu ta representa un gran mayoria di e comunidad Dominicano den e isla aki. P’esey na defensa di nan derechonan, nan a dicidi di bin cu un serie di keho den un carta cu nan a entrega na Sr. Edward McCollum, kende ta vice Consul Dominicano encarga cu e area comercial na Aruba.

Renuncia

Un di e keho tin di haci cu e ausencia di e mesun Consul General, Sr. Victor Marcelino Comprés Rosario, kende ta na encargo di e consulado aki. Segun e movemento aki, ultimo biaha cu e diplomatico Dominicano a haci acto di presencia tabata durante e acto protocolario realisa dia 27 di februari ultimo. Dos dia despues el a bay bek pa su pais. Desde dia 29 di februari ultimo, e no ta atendiendo mas cu e sede consular Dominicano na Aruba. P’esey Movemento Dominicano Unidos na Aruba ta pidi pa Gobierno Dominicano retira e Consul general actua.

Valdes a bisa cu Sr. Comprés Rosario mester ta presente den nan sede consular cumpliendo cu su deber. Alomenos si e no tin un permiso medico of den periodo di vakantie. “E mester tin licencia medico of vakantie permanente, pasobra nunca e ta akinan”, el a declara.

Valdes ta haya cu esaki ta un falta di respet pa tur ciudadano Dominicano. Ademas esaki mester wordo considera como ‘abandono di trabao’. P’esey den nomber di e movemento aki, nan ta pidi e renuncia mesora di e Consul general di Republica Dominicana na Aruba. Si e diplomatico no ta renuncia, nan lo cuminsa cu un accion di firma contra dje. El a bisa cu esaki ta posibel den cuadro di e Constitucion Dominicano, caminda nan ta pidi e renuncia di e diplomatico actual, y tambe nan ta pidi un Consul nobo.

Movemento Dominicano Unidos na Aruba ta denuncia cu den e lista di e mision diplomatico aki ta aparece 10 consul di cual 8 di nan no ta trahando den e sede consular aki. Pero si nan ta cobrando 2.500 dollar pa luna sin traha.

Otro kehonan

Nan ta keha cu nan consulado no ta trahando nan paspoort di un forma mas diligente. Nan ta reclama cu pa procesa un documento asina importante pa esun cu ta biba den exterior, e consulado ta tarda te hasta seis luna pa renoba un paspoort. Mientras cu e tempo maximo mester ta un luna.

Tambe nan ta reclama cu e Hunta Central Electoral a bin cu un centro pa traha cedula y acta den e mesun consulado. Movemento Dominicano Unidos na Aruba ta haya cu e solicitud aki valido debi cu na Aruba tin alrededor di 7mil Dominicano. Mientras cu actualmente e Consulado no ta realisando un bon trabou. Valdes a bisa cu dia 5 di juni tin eleccion y nan consulado no tin e capacidad pa atende cu eleccion aki. Ya cu a pesar cu tin mashin, e consulado no tin un tecnico cu por duna renobacion of duna cedula nobo. Encuanto si e Movemento Dominicano Unidos na Aruba tin un interes politico su tras, Valdes a reacciona bisando cu no ta berdad.

Igualmente nan ta haya cu trabao di mantencion di e Plaza Juan Pablo Duarte –otorga pa gobierno di Aruba – no ta hayando e mantencion debido. Nan ta expresa nan preocupacion pa situacion cu algun miembro di e comunidad Dominicano na Aruba ta pasando aden cu problemanan riba tereno di husticia, salud, status migratorio, entre otro.

Nan ta demanda mas atencion di e Consulado Dominicano como representante di e interes di e residentenan Dominicano na Aruba. Pero nan ta wak cu Consulado Dominicano ta ignora e interes di nan comunidad.

Igualmente organisacion Dominicanos Unidos en Aruba ta exigi pa e Consulado Dominicano por rindi cuenta riba nan presupuesto. Nan ta wak cu e ciudadanonan Dominicano no ta wordo beneficia y nan no ta satisfecho cu e servicio cu e consulado aki ta ofrece na nan. Mientras cu tur esnan cu mester haci uzo di cualkier servicio di e consulado, mester paga un tarifa cu nan ta considera malo cu un atencion desagradabel. Nan a pidi pa pronto na por haya un contesta for di autoridad Dominicano