Aña 2021 a habri cu e noticia di un hoben di apenas 15 aña cu a asesina Rudy Ras cu un cuchiu. Siguientemente un otro hoben di 16 aña a hinca su welo cu cuchiu. Hobennan tabata involucra den tur e ocho asesinato cu a ser cometi e aña aki. Aña ta cerando y ainda no tin claridad den e caso di e hoben di 20 aña, DJ Louisville, cu a cay for di e di tres piso di e parkinglot di Paseo Herencia Mall y a fayece. Banda di asesinato hobennan tabata involucra den tiramento, joyriding y otro delitonan. Pero con nos Gobierno ta interpreta e desaroyonan aki?

Nos lo califica cada hoben involucra den crimen como un appel putri? Berdad nos sistema penal mester mara consecuencia na actonan criminal, pero un Gobierno cu tin maneho social na pecho mester preocupa su mes pa e salud fisico y mental di nos hobennan. Pero e ora e pregunta ta surgi kico Gabinete Wever-Croes I a haci cu tur e miyones pa e crisis social?

Ta apenas un par di luna pasa nos a haya un estudio, titula “Quality of life of Aruban youth” (juni 2021), cu ta enfoca riba muchanan pre-adolescente (10-13 aña). Ta apenas awor ta concretisando e Family Justice Center cu mester coordina un miho servicio na victimanan di abuso, incluso un investigacion mas riguroso pa garantisa un caso mas fuerte dilanti di Hues. Corda cu e Family Justice Center mes no lo haci ningun investigacion. Pakico un centro cu ta coordina e esfuerso di diferente entidad cu ya caba tin nan personal manera HOH, OM y KPA-Jeugd en Zedenpolitie mester di 53 trahado ta un misterio. Lamentablemente e esfuerso di Gabinete Wever-Croes I no tabata suficiente of no tabata adecua. P’esey Grupo ta Basta ta sigui boga pa cambio. Ademas e Sociale Crisisplan tabata tin como meta pa proteha mucha y hoben cu enfasis riba situacionnan na unda e baca a hoga caba. Atencion pa un desaroyo saludabel di e mucha y e hoben no tabata tin.

E solucion pa garantisa un miho futuro pa nos hobennan ta pa sali for di crisis-mode y delinea un plan integral. Na 2011 caba señora Hellen van der Wal a publica un estudio, titula “Jeugdigen in Aruba: hoe worden ze (niet) delinquent?”. Den e estudio ey e ta boga pa mas atencion pa hobennan cu no ta bay skol pa motibo cu e grupo aki ta involucra den formanan mas grave di delincuencia. P’esey introduccion di leerplicht tabata un paso hopi necesario. P’esey un naschoolse opvang ta asina importante. Señora Hellen ta mustra den su estudio cu mester bin cu un Plan Integral pa Hobennan (personanan entre 10 y 24 aña). Nos mester bin cu mas actividadnan structura despues di scol pa nos hobennan. Tambe nos mester tin mas atencion pa e resultadonan na scol mes. Un hoben cu ta bay bon na scol, ta un hoben cu ta dedica na su futuro. E no tin tempo pa delincuencia. Pero, pa un hoben ta exitoso nos mester percura cu educacion ta fun, ta stimula e curiosidad di e hoben y ta stimula e hoben pa alcansa nivelnan halto di diferente habilidad.

Cu orguyo nos ta mira con e veld social ta trahando duro, pero nos ta wanta nos curazon pa cu maneho di Gobierno riba area social. Nos experiencia cu minister Glenbert Croes y Rudy Lampe ta poco alentador. Esey a crea un nubia scur riba maneho social y di educacion na Aruba. Maneho social ta rekeri un bon planificacion y coordinacion. Ban wak si minister Rocco Tjon y minister Endy Croes ta logra aleha for di e nubia scur. Ohala, nan ta mas efectivo cu Wever-Croes I, pa por salvaguardia e futuro di nos hobennan.

https://research.vu.nl/en/publications/jeugdigen-in-aruba-hoe-worden-ze-niet-delinquent-empirisch-gebase

https://www.ea.aw/pages/quality-of-life-of-aruban-youth-doc/