(AP) – Lil Nas X a gana video musical di e aña durante edicion diadomingo di MTV su premio VMA, riba e mesun anochi cu Justin Bieber a haci su regreso triunfante na escenario, y a gana e premio di artista di aña.

“Mi ta balora e premio aki hopi,” Lil Nas X a bisa mientras cu el a acepta e anochi su premio final pa e video di su cantica “Montero (Call Me By Your Name).”

Mayoria di e comienso di e anochi a bay pa Bieber, ken pa su prome presentacion na VMAs den 6 aña, a baha riba escenario for di ariba na Barclays Center na comienso di e show pa un presentacion energetico di su e cantica “Stay” cu Kid LAROI y despues su hit recien “Ghost.”

E VMAs a celebra MTV su di 40 aniversario, mesclando e momentonan entre e celebridadnan di e comienso di e canal di television, manera Cyndi Lauper y e apertura di show di tempo ey Madonna, cu presentacionnan energetico di artistanan actual, manera Olivia Rodrigo, Lil Nas X, Camila Cabello y Chloe.

Bieber tabata entre e gran nominadonan den e ceremonia. Danki na su cantica “Peaches” el a gana e premio di Best Pop, un cantica den cual Daniel Caesar y Givgeon, ken tabata cu su persona riba escenario, a participa.

Cu paña un poco hancho, Bieber a demostra su aprecio na e hecho cu e por a ricibi su premio den persona y a duna danki na su casa, Hailey, pa a brinda apoyo den e proceso di su regreso.

“Manera nos sa, tin hopi mas cu ta pasando den mundo na e momentonan aki,” Bieber a bisa durante su discurso na momento di acepta su premio despues di a gana Artista di Aña. “Mi sa cu probablemente boso a tende esaki hopi biaha. Nos ta pasando den temponan dificil cu e pandemia di Covid-19 cu recientemente ta aumentando mundialmente atrobe. E ta un situacion dificil. Musica ta un manera hopi special y grandioso di por yega na cada un persona y uni nos tur. Pa e motibo aki nos ta aki na e momentonan aki, hunto. Nos tur ta aki presente, hunto.”

Durante apertura di e programa, Madonna a bisa e publico: “Nan a bisa cu nos no lo dura. Pero nos ta aki ainda.”

Momentonan despues cu Olivia Rodrigo a duna un presentacion di su hit “Good 4 u,” el a subi escenario atrobe pa acepta e anochi su prome premio pa su gran hit “Driver’s License.” Despues el a gana e premio di Miho Artista Nobo.

“Mi ta sinti hopi agradecido cu mi por skirbi musica, traha cosnan cu mi stima y yama esaki mi trabao,” Rodrigo a bisa, ken tabata pasando pa su prome nominacion y premio. Anteriormente durante e ceremonia, e cantante a yama esaki e dia mas “mas magico di mi bida.”

Jennifer Lopez, ken 3 dia anteriormente a haci su romance cu Ben Affleck oficial na Venice International Film Festival, pa e lansamento di Affleck su pelicula “The Last Duel” ta e persona cu a presenta Rodrigo cu su premio.

Billie Eilish a gana e premio di video mas gusta pa fanaticonan pa su cantica “Your Power.” Den su speech di aceptacion, el a bisa cu Alicia Keys a duna su persona un sunchi na su cachete, tambe el a papia di e satisfaccion di skirbi e cantica tocante hende muhe y e poder cu nan tin.

Eilish y Rosalia a gana e premio pa Best Latin Video pa nan colaboracion “Lo Vas A Olvidar.” E grupo Koreano BTS a gana 3 premio, incluyendo grupo di aña, miho K-pop y cantica di e temporada cu nan cantica “Butter.”

“Nos tin cu proteha nos hende muhenan cu tur nos forsa,” Eilish a conta, mientras su ruman homber ken tambe ta su productor a aplaudi su ruman muhe desde su asiento.”Nos tur tin cu corda cu nos tin poder, pero tambe nos tin cu corda di no abusa e poder aki.”

Lauper, ken ta e persona cu a presenta Bieber cu su prome premio, tambe a boa pa e derechonan di hende muhe.

“Girls still want to have fun” Lauper a bisa, ken ta conoci pa su cantica “Girls just want to have fun.” “But we also want to have funds”, agregando cu ademas di tin un bida feliz, tambe nan kier fondo, pago igual, control riba nan curpa y derechonan fundamental.

Lil Nas X a subi escenario cu Jack Harlow, despues el a presenta su cantica controversial “Montero (Call Me By Your Name.)” Kacey musgraves y Shawn Mendes tambe a subi escenario.

Simone Biles, e gimnasta Olimpico a subi escenario pa presenta Doja Cat, e programa su anfitrion, ken a subi aire durante su presentacion. Cu wayanan ta wanta su persona el a flota riba e publico y a baha riba escenario unda cu el a canta “Been Like This” y “You Right.”

LEAVE A REPLY

Please enter your comment!
Please enter your name here