Un muhe na estado a bay Chichago pa cumpra paña di baby for di un oferta cu el a mira online, pero a wordo horca y corta pa saca e baby di su bariga, segun informe di polis y miembro di famia.
Segun reportenan, e sospechoso, Clarisa Figueroa, kier a lanta un baby despues cu su yiu adulto a fayece. El a regala e hoben mama algun paña di baby, y despues a pidi’e pa bin busca mas paña, unicamente pa mat’e y bay cu su baby. Marlen Ochoa-Lopez su baby ta hospitalisa den condicion grave. Yiu y pareha di e sospechoso tambe a wordo aresta como complice, y ta sperando cargo, segun polis. E curpa di e mama, kende tabatin 19 aña di edad, a ser haya patras di e cas unda e tabata keda.
Ochoa-Lopez, kende tabata 9 luna na estado, tabata saliendo for di scol dia 23 di april. E mesun dia, Figaroa a yama paramedico na e cas na Southwest Side pa motibo di un baby cu problema pa hala rosea. “Nos ta kere cu nan a mat’e, y cu nan a forsa pa saca e yiu”, Anthony Guglielmi, vocero di polis, a bisa.
Guglielmi ta yam’e un ‘acto di violencia con no por expresa cu palabra’. E famia di Ochoa-Lopez, un muhe casa y mama di un mucha di 3 aña, a bisa cu el a bay pa cumpra stroller y paña di un muhe cu tabata bende riba medio social.
E famia a busca Marlen desde su desaparicion mas di 3 siman pasa. Nan a organisa un buskeda, nan a tene conferencia di prensa y keda pusha polis pa informacion y detaye. Yiovanni Lopez, casa di Marlen, a bishita su yiu na hospital y dun’e nomber Yadiel segun reporte di Chicago Sun-Times. “Dicon hende a haci esaki? Mal hende ta haci e actonan aki? E no a haci nada malo cu nan. E tabata un bon persona”, el a bisa.
