Fanaticonan a recorda John Lennon cu flor, bela y canticanan diamars ultimo riba e di 40 aniversario di morto di e ex-Beatle, despues cu el a wordo tira pafo di su apartament na New York.
Den seccion Strawberry Fields di Central Park, cu ta algun stap leu di unda el a wordo tira y ta dedica na Lennon, potretnan di e icono a aparece rond di e mosaic ‘Imagine’ hunto cu un revista, un mata chikito y otro memorabilida, mientras musiconan tabata toca cerca.
Tabata dia 8 di december 1980 na momento cu e musico di fama mundial, tabata cu su esposa Yoko Ono, y a ser tira fatalmente pa Mark David Chapman pafo di e apartamentnan Dakota riba e Upper West Side di Manhattan. Chapman ainda ta den prison.
Ono a marca e aniversario riba rednan social, igual cu Paul McCartney y Ringo Starr, e dos miembronan sobreviviente di e cuarteto cu tabata the Beatles. George Harrison a fayece na 2001.
“E morto di un ser keri ta un experiencia teribel. Despues di 40 aña, Sean, Julian y ami ainda ta sinti su falta”, Ono a bisa, referiendo na e dos yiunan di Lennon. Tambe el a destaca e costo di violencia di arma di candela, cu un potret di e bril di Lennon yen di sanger, y listando e cantidad di hende cu el a bisa a muri pa arma di candela na Merca desde morto di Lennon.
McCartney y Starr ambos a pone post cu imagennan di nan den nan hubentud hunto cu Lennon.
