Mientras futbol profesional a bolbe Dinamarca, fanaticonan a uza Zoom pa forma parti di e accion.
Miles di fanatico di futbol Danes a log in den e software di conferencia ayera nochi y a wordo transporta den stadion Ceres Park pa un wega di liga entre AGF Aarhus y Randers cu a duna apertura na e reanudacion di e temporada di e pais, afecta pa pandemia.
Mientras e stadion mes tabata sin fanatico, cara di miles di sostenedonan kende a join e yamada di Zoom a ser mustra riba pantaya grandi riba un banda di e cancha.
Famianan bistiendo paña di club y sjaal a aplaudi y grita den nan sala. Algun tabata primi nan mokete den alegria despues cu Simon Piesinger a anota for di 40 yarda pa pone Randers, e team bishitante, dilanti na minuut 36.
Aarhus a empata den tempo extra y e wega a termina 1-1.
Prome cu e wega, Aarhus a describi e muraya di Zoom como e prome ‘tribuna virtual’ di mundo. A pone zonido di publico durante e partido, y tabatin ‘espectador’ di carton na luga riba e tribuna.
Weganan ta tumando luga sin publico na Dinamarca, igual na otro paisnan, durante brote di coronavirus. Superliga Danes ta suspendi desde mita di mei.
FC Midtjylland, lider di e liga, ta hunga su prome wega bek mañan na cas contra AC Horsens, y ta planeando un ‘drive-in’, den cual sikiera 2mil sostenedo por mira e wega for di paden nan auto pafo di e MCH Arena di e team. Pantaya gigante a ser instala den parkeo di e stadion, y imagen di e fanaticonan den nan auto lo ser transmiti paden di e arena.
