Dos homber ta demandando organisadonan di festival di musica Ultra, bisando cu a nenga di duna nan placa bek despues cu a cancela e festival di musica electronico na Miami na maart ultimo, pa motibo di pandemia di coronavirus.

Samuel Hernandez di Miami, y Richard Montoure di estado di Washington, a entrega e demanda diamars na corte federal na Miami. Tambe nan ta buscando status di ‘class-action’ pa obtene reembolso completo, cu interes, pa miles di persona rond mundo cu a cumpra ticket.

Ultra tabata programa pa weekend di 20 di maart na Bayfront Park na downtown Miami, pero guianan estricto di distanciamento social imponi pa gobiernonan local y estatal anteriormente e luna ey pa combati transmision di coronavirus, a prohibi tur reunion grandi, incluyendo festival y concierto. Entre e actonan programa pa presenta na e evento tabata David Guetta, The Chainsmokers, Afrojack, Cash Cash, Martin Garrix y Galantis, segun website di Ultra.

Despues di negociacion cu e ciudad di Miami, organisadonan di Ultra a anuncia cu nan tabata posponiendo e festival te cu maart 2021, segun e demanda. Na luga di ofrece placa bek pa e festival 2020, organisadonan a ofrece pa honra e ticket pa e eventonan di 2021 y 2022, maske no a confirma e eventonan ainda.

E demanda ta bisa cu Ultra ta kedando cu e placa na luga di ofrece reembolso, y cu esey ta inhusto y no equitativo. Maske e termino y condicion di e compania ta bisa cu ta reserva e derecho di no ofrece placa bek den caso cu pospone e evento, e demanda ta bisa cu e no por cumpli cu e terminonan y cu mester haci nan invalido.

Organisadonan di Ultra no a duna comentario inmediato.

 

LEAVE A REPLY

Please enter your comment!
Please enter your name here